Memleket basshysy Qasym-Jomart Toqaev Parlament Senatynyń tóraǵasy Máýlen Áshimbaevty qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaevqa 14-15 qyrkúiekte elordada ótetin Álemdik jáne dástúrli dinder kóshbasshylarynyń VII sezine daiyndyq týraly málimet berildi.
Parlament Senatynyń Tóraǵasy, Sezd Hatshylyǵynyń meńgerýshisi Máýlen Áshimbaev dinaralyq forýmǵa 50-den asa elden 100-den astam delegatsiia keletinin jetkizdi. Atalǵan jiynǵa Rim Papasy Frantsisk, Ál-Azhardyń Joǵarǵy imamy sheih Ahmad at-Taieb jáne basqa da dinder kóshbasshylary qatysady dep josparlanyp otyr.
Senat Tóraǵasynyń aitýynsha, aldaǵy is-shara álemdik buqaralyq aqparat quraldarynyń qyzyǵýshylyǵyn týdyryp otyr. 200-den astam sheteldik jáne 300-den astam qazaqstandyq BAQ ókilderi akkreditatsiiadan ótken.
Sezd aiasynda Deklaratsiia qabyldanbaq. Bul qorytyndy qujat forýmǵa qatysýshylardyń órkenietaralyq jáne konfessiiaaralyq, sondai-aq jahandyq damýdyń ózekti máselelerine degen ustanymyn bildiredi.
Prezident qazirgi jaǵdaida Sezd ótkizýdiń mańyzy joǵary ekenine toqtaldy. Qasym-Jomart Toqaev jahandyq dialog mádenietin ilgeriletý qajettigin jáne Qazaqstannyń osy úderiske qatysýy mańyzdy ekenin atap ótti.
Sonymen qatar Memleket basshysyna Senattyń aldaǵy ýaqytqa arnalǵan jumys jospary baiandaldy.
