Foto: Akorda.kz
Prezident Qasym-Jomart Toqaevtyń Almaty qalasyna jumys sapary biyl 1 maýsymda paidalanýǵa berilgen sel tasqynynan qorǵaityn bógetpen tanysýdan bastaldy.
«Aiýsai» bógeti Úlken Almaty ózeniniń basseininde ornalasqan. Onyń joǵary jaǵynda sel qaýpi bar 98 ýchaske, 89 muzdyq, 20 morenalyq jáne muzdy kól bar. Bóget sel júrý qaýpin barynsha azaityp, 500 myńnan astam halyq pen 2 myńǵa jýyq nysannyń tabiǵat apatynan qorǵalýyn qamtamasyz etedi.
Elimizdiń biik taýly aimaqtarynda 970 morenalyq kól bar. Onyń ishinde 156 kólde sel júrý qaýpi joǵary. Tótenshe jaǵdailar ministri Syrym Sháriphanov biyl sel júrýi yqtimal 13 kólde apattyń aldyn alý jumystary júrgizilgenin baiandady.
Sonymen qatar «Qazseldenqorǵaý» mekemesiniń basshysy Qairat Bekenov Memleket basshysyna tabiǵat apattarynyń aldyn alý jumystary jóninde málimet berdi.
Onyń aitýynsha, arnalardaǵy sýdy turaqtandyratyn jańa qorǵanys nysandaryn salý qajet. Olar Úlken Almaty, Esik, Talǵar, Qaskeleń jáne Túrgen ózenderiniń basseinindegi sý aǵysynyń jyldamdyǵyn azaityp, aǵyn sýdyń arnadan asyp ketpeýine septigin tigizedi.
Qasym-Jomart Toqaevqa pilottyq joba aiasynda ornatylǵan 31 tsifrlyq gidrobeket tanystyryldy. Bul qondyrǵylar sýdyń jyldamdyǵyna, temperatýrasyna, lailylyǵyna jáne basqa da kórsetkishterge onlain-rejimde monitoring júrgizedi. Mundai tehnologiialar keleshekte elimizdiń jeti taýly aimaǵynda qoldanysqa engiziledi. Gidrobeketterdegi málimet TJM Daǵdarys jaǵdaiyn basqarý ortalyǵynyń biryńǵai aqparattyq júiesimen integratsiialanatyn barlyq ǵylymi uiym men salalyq vedomstvolarǵa qoljetimdi bolady.
Memleket basshysy qala turǵyndarynyń qaýipsizdigin qamtamasyz etý úshin selden qorǵaý sharalaryn júrgizý mańyzdy ekenin atap ótti. Bul rette Prezident Tótenshe jaǵdailar ministrligi, Almaty qalasy ákimdigi jáne «Qazseldenqorǵaý» mekemesi ózara tyǵyz qarym-qatynasta jumys isteýi qajet ekenin aitty.
