Memleket basshysy Koroldiktiń syrtqy saiasi vedomstvo basshysyna iltipat bildire otyryp, onyń bul sapary elimizdiń tarihyndaǵy betburysty sátpen – jalpyulttyq referendýmmen tuspa-tus kelgenin atap ótti. Atalǵan asa mańyzdy sharanyń qorytyndysy Jańa Qazaqstan qurýǵa kirisýge múmkindik beredi.
Qasym-Jomart Toqaev Saýd Arabiiasy Qazaqstannyń arab jáne islam álemindegi basty seriktesiniń biri ekenin atap ótti.
"Elderimiz ortaq qundylyqtarǵa negizdelgen saiasi dialogty dostyq pen ózara senim rýhynda dáiekti túrde damyta beredi. Eki qasiettiniń Saqtaýshysy Korol Salman ben Ábdel Ázizben jáne Taq murageri Muhammed ben Salmanmen aradaǵy tabysty yntymaqtastyqty odan ári jalǵastyrýǵa daiyn ekenimizdi bildiremin", – dedi Prezident.
Qasym-Jomart Toqaev aýyl sharýashylyǵy, munai himiiasy, týrizm, taý-ken metallýrgiiasy jáne qarjy salalaryndaǵy birlesken jobalardy júzege asyrý úshin qolaily investitsiialyq múmkindikterdiń bar ekenine nazar aýdardy.
Bul rette Memleket basshysy Qazaqstan men Saýd Arabiiasynyń úkimetaralyq komissiiasy men Iskerlik keńestiń jumysyn jandandyrý mańyzdy ekenine toqtaldy. Sondai-aq tiisti kelissózderdi júrgizý úshin ókiletti úkimettik delegatsiiany Er-Riiadqa jiberýge daiyn ekenin aitty.
Budan bólek, Memleket basshysy Mekke men Medinede qazaqstandyq qajylarǵa qajetti jaǵdai jasalatyny jáne dástúrli qonaqjailyq kórsetiletini úshin Koroldiktiń basshylyǵyna rizashylyǵyn bildirdi.
Feisal ben Farhan Ál Saýd Saýd Arabiiasy Koroli men Taq murageriniń Prezident Qasym-Jomart Toqaevqa jáne Qazaqstan halqyna joldaǵan sálemin jetkizdi.
Ministr eki memleket arasyndaǵy qarym-qatynastardyń dáiekti túrde damyp kele jatqanyn atap ótti. Sondai-aq Koroldik basshylyǵynyń diplomatiialyq bailanystar ornaǵannan bergi jan-jaqty yntymaqtastyq baǵyttaǵy jetistikterdi joǵary baǵalaitynyn aitty.
Saýdiialyq diplomat Qazaqstan Prezidentin elimizde referendýmnyń tabysty ótýimen quttyqtady.
"Saýd Arabiiasy Koroldigi Sizdiń basshylyǵyńyzben Ekinshi Respýblikany qurý isinde jáne Qazaqstannyń odan ári órkendeýine baǵyttalǵan aýqymdy reformalardy júzege asyrýdy jalǵastyrýda tabys tileidi", – dedi ministr.
Feisal ben Farhan Ál Saýd saýda-ekonomikalyq jáne investitsiialyq yqpaldastyqty nyǵaitýdyń perspektivalaryn egjei-tegjeili talqylaý úshin qazaqstandyq seriktestermen kezdesý uiymdastyrýǵa Saýdiia tarapy daiyn ekenin jetkizdi. Bul jýyq arada Qazaqstanda joǵary deńgeidegi kezdesý ótkizý úshin berik negiz bolady.
Sonymen qatar, kezdesýde olar halyqaralyq kún tártibiniń ózekti máseleleri jóninde pikir almasty.
Áńgimelesý sońynda Qasym-Jomart Toqaev Korol Salman ben Ábdel Ázizge jáne Taq murageri Muhammed ben Salman Ál Saýdqa júrekjardy sálemin joldady.
