Qasym-Jomart Toqaev Saýd Arabiiasy Koroldigi konsýltativtik keńesiniń tóraǵasy Abdalla Ál ash-Sheihti qabyldady, dep habarlaidy "Ult aqparat" Aqordanyń resmi saityna silteme jasap.
Qazaqstan Prezidenti Saýd Arabiiasyn islam álemindegi senimdi seriktes ári Qazaqstannyń Táýelsizdigin tanyǵan alǵashqy arab memleketteriniń biri ekenin atap ótti.
– Saýd basshylyǵymen árdaiym bailanystamyz. Tamyzda Taq murageri Muhammed ben Salman Ál Saýdmen telefon arqyly áńgimelesken kezde birqatar ýaǵdalastyqtarǵa qol jetkizildi. Al qyrkúiek aiynda Investitsiia ministri Halid ál-Falihpen kezdestim. Bul bailanystar eki el arasyndaǵy yntymaqtastyqqa serpin beredi dep esepteimin, – dedi Memleket basshysy.
Kezdesýde ekijaqty saýda-ekonomikalyq qarym-qatynastar talqylandy. Qasym-Jomart Toqaev saýd kompaniialarynyń álemdik naryqtaǵy múmkindikteri men tájiribesin eskere otyryp, Qazaqstandaǵy jobalarǵa belsendi qatysýǵa shaqyrdy.
Saýd Arabiiasy Koroldigi konsýltativtik keńesiniń tóraǵasy Abdalla Ál ash-Sheih qabyldaǵany úshin Qazaqstan Prezidentine alǵys aityp, elimizdegi saparynyń tabysty ótip jatqanyn aitty.
– Men baýyrlas, dostas Qazaqstanǵa kelgenime qýanyshtymyn. Biz parlamenttik deńgeide birqatar jemisti kezdesý ótkizdik. Mundai júzdesýler elderimizdi jaqyndastyra túsedi. Memleketterimizdiń basshylary deńgeiinde qabyldanǵan sheshimderdi júzege asyrýda osyndai saparlardyń máni zor dep esepteimin, – dedi Saýd Arabiiasy Koroldigi konsýltativtik keńesiniń tóraǵasy.
Sonymen qatar eki el arasyndaǵy taýar ainalymyn arttyrý máseleleri talqylandy.
Kezdesý sońynda Qasym-Jomart Toqaev Abdalla Ál ash-Sheihti II dárejeli «Barys» ordenimen marapattady.
