Qasym-Jomart Toqaev memleket jáne qoǵam qairatkeri Berdibek Saparbaevty qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysyna óńirlerde atqarylyp jatqan jumystar týraly, Prezidenttiń bastamalary men saiasi reformalaryn halyqtyń keńinen talqylap jatqany týraly málimet berildi.
Berdibek Saparbaev ózi qyzmet atqarǵan Jambyl oblysynda oryndalyp jatqan Prezident tapsyrmalarynyń nátijelerin keńinen baiandady. Atap aitqanda, azamattardyń turmys sapasyn arttyrýǵa, qoǵamnyń yntymaǵy men birligin nyǵaitýǵa baǵyttalǵan «Asar», «Týǵan jerge taǵzym», «Jomart túlek» jáne «Beibitshilik pen kelisim» atty jobalar jaily aityldy. Sonymen qatar Jambyl óńirinde júzege asyrylǵan pilottyq joba týraly málimet berildi. Bul bastamalar árbir otbasynyń ózin-ózi asyraýyna jaǵdai jasaýǵa negizdelgen.
Berdibek Saparbaev Qasym-Jomart Toqaevqa qýańshylyq jaǵdaiynda aýyl sharýashylyǵyn álsiretip almai, odan ári damytý jóninde, sondai-aq jergilikti bilik pen ata-analardyń birlese otyryp, balalardy eńbekke baýlý isin qolǵa alý týraly usynystaryn aitty.
Kezdesý barysynda jastar arasyndaǵy jumyssyzdyqty sheshý máselesi de talqylandy.
