Ulttyq qaýipsizdik komiteti tóraǵasynyń birinshi orynbasary Samat Ábish qyzmetinen bosatyldy, dep habarlaidy "Ult aqparat".
“Memleket basshysynyń ókimimen Samat Satybaldyuly Ábish Qazaqstan Respýblikasy Ulttyq qaýipsizdik komiteti Tóraǵasynyń birinshi orynbasary laýazymynan bosatyldy”, – delingen Aqorda saitynda.
Eske sala ketsek, 14 qańtarda komitet Samat Ábishtiń eńbek demalysynda ekenin málimdegen edi.
«Kelip túsken suraýlarǵa sáikes, QR UQK Tóraǵasynyń birinshi orynbasary Samat Ábish óz qyzmetinde ekenin habarlaimyz. Ústimizdegi jylǵy 13 qańtardan bastap ol jyl saiynǵy demalysynda» delingen habarlamada.
Samat Satybaldyuly Ábish 1978 jyly 20 tamyzda Almaty oblysynda dúniege kelgen.
- QR Ulttyq qaýipsizdik komiteti men RF Syrtqy barlaý qyzmeti akademiialaryn bitirgen.
- 2000-2006 jyldary – QR UQK organdarynda ofitserlik quramyndaǵy qyzmette boldy.
- 2006-2008 jyldary - QR Ádilet ministrligi Tirkeý qyzmeti komiteti tóraǵasynyń orynbasary, tóraǵasy.
- 2008-2010 jyldary - QR Ádilet ministrliginiń jaýapty hatshysy.
- 2010-2013 jyldary - QR UQK Kadrlar departamentiniń bastyǵy, Astana boiynsha departamentiniń bastyǵy.
- 2013-2015 jyldary – QR UQK tóraǵasynyń orynbasary.
- UQK tóraǵasynyń birinshi orynbasary qyzmetin 2015 jyldyń jeltoqsan aiynan beri atqaryp keldi.
Aita keteiik, 43 jastaǵy Samat Ábish – Nursultan Nazarbaevtyń inisi Satybaldy Nazarbaevtyń uly. General-leitenant sheni bar.
