Sońǵy jarty ǵasyrda Aziia qaita túlep, qarqyndy damyp keledi. Bul týraly búgin elordada ótip jatqan Aziia elderi qalamgerleriniń tuńǵysh forýmynda Qazaqstan Prezidenti Qasym-Jomart Toqaev aitty, dep habarlaidy "Ult aqparat".
«Uly dalamyz - san alýan órkenietter men mádenietterdiń kýási. Elimiz alyp qurlyqtyń batysy men shyǵysyn, kúngeii men teriskeiin jalǵaǵan toǵyz joldyń torabynda ornalasqan. Biz bir kezderi Uly Túrki qaǵanatynan miras bolǵan túrki tegimizdi saqtai bilgen halyqpyz. Búgingi túrki jurtynyń teńdessiz jetistikteri sol dáýirlerden qalyptasqan uly muralarmen tyǵyz bailanysty», - dedi Qazaqstan Prezidenti.
Memleket basshysy Aziia uly órkenietterdiń dúniege kelýine, órken jaiýyna, keiin tarih qatparyna sińip, qalyptasýyna kýá bolǵan kóne qurlyq ekendigin basa aitty.
«Arab, parsy, qytai, úndi órkenietteri - adamzat tarihynyń ajyramas bóligi. Shyǵys mádenietteri san alýan sipattaryna qaramastan, ózara astasyp jatyr. Aziia halyqtary órkenietter qaqtyǵysyna ushyramai, etene úndestikte damýynyń basty syry da osynda. Sońǵy jarty ǵasyrda Aziia qaita túlep, qarqyndy damyp keledi. Shyǵys memleketteri álemdik alpaýyttar qatarynan nyq oryn aldy.
Jahandanýdyń shyǵystyq dástúri naqty sipatqa ie bolyp, keńeie túsýde. Mysaly, qazir Uly Jibek jolynyń ekonomikalyq mán-mańyzy ǵana kóbirek aitylady. Shyn máninde onyń tutas órkenietterdi toǵystyratyn kúshke ie bolǵany eskerile bermeidi. Búginde Aziianyń ozyq ekonomikasymen birge ádebieti, óneri, bilim júiesi de aldyńǵy qatarǵa shyqty. Aziia halyqtarynyń sóz óneri bai, tamyry tereńde», - dedi Q.Toqaev.
Osy rette Memleket basshysy jer betindegi jazý-syzýdyń shyǵystaǵy Mysyr men Qytaida paida bolýy sonyń aiqyn dáleli ekendigine nazar aýdartty.
«Túrki, Qytai, Úndi, Arab, Parsy elderiniń kóptegen kóne jádigerleri dáýir synynan súrinbei ótip, búginge deiin jetti. Bul muralardyń qundylyǵy nede? Kóne eskertkishterdiń negizinde jatqan jalpy adamzattyq qundylyqtar ádebiet arqyly álemge taraldy. Ár oqyrmannyń kókeiindegi saýaldardyń jaýaby men jahandyq máselelerdiń sheshimi de dál osyndai týyndylardan tabylady», - dedi Qazaqstan Prezidenti.
Sondai-aq ol Shyǵystan shyqqan qalamgerlerdiń kúlli dúnieni moiyndatyp otyrǵanyn aitty.
«Aziia ádebietiniń órisi aitarlyqtai keńeiip keledi. Shyǵystan shyqqan qalamgerler kúlli dúnieni moiyndatyp otyr. Bul rette Aziia ádebietin álemge áigilep, dáriptei túsý - forýmnyń taǵy da bir mańyzdy mindeti dep sanaimyn. Shyǵys danalarynyń dástúr sabaqtastyǵy sizderdiń týyndylaryńyz arqyly jalǵasyn tabady dep oilaimyn», - dedi Memleket basshysy.
Qazaqstan Prezidenti jahandaný dáýirinde Aziia syn-qaterlerge laiyqty tótep bere otyryp, ózine tán biregei erekshelikterin saqtap kele jatqanyn aitty.
«Batys tehnologiiasy Aziia rýhaniiatymen úndesip, shyǵystyq jańǵyrý úrdisin dúniege ákeldi. Qalalarda shyǵys áleminiń bolmys-bitimin nasihattaityn kreativtik klass paida boldy. Rýhani bailanystardy keńeitý - jańa zamandaǵy Aziia halyqtarynyń birtutastyǵynyń kepili. Biz bul úrdisti qoldap, álem halyqtarynyń yntymaq-birligin nyǵaitýǵa úles qosýǵa tiispiz», - dedi Q.Toqaev.
