Prezident Qasym-Jomart Toqaev Rim Papasy Frantsiskpen elorda áýejaiynda kezdesti, - dep habarlaidy "Ult aqparat" Aqordanyń resmi saityna silteme jasap.
Kezdesý rásimi barysynda memleketter basshylary bir-birine eki eldiń delegatsiia múshelerin tanystyrdy. Sodan keiin Qazaqstan Prezidenti men Katolik shirkeýiniń basshysy prezidenttik terminaldyń Kamindi zalynda qysqasha áńgimelesti.
Qasym-Jomart Toqaev Rim Papasyna iltipat bildire otyryp, onyń Qazaqstanǵa kelýge sheshim qabyldaǵany úshin shyn júrekten alǵys aitty.
– Bul oqiǵanyń tarihi mańyzy bar ekeni sózsiz. Sizdiń saparyńyz, eń aldymen barsha qazaqstandyqtyń nazaryn aýdaratynyna kámil senemin. Sizdiń saparyńyzdyń aiasynda memlekettik apparattyń, azamattyq qoǵamnyń, diplomatiialyq korpýstyń jáne BAQ-tyń ókilderi qatysatyn is-shara ótedi. Barlyǵy Sizdiń sóileitin sózińizdi asyǵa kútip otyr. Sizdiń Álemdik jáne dástúrli dinder kóshbasshylarynyń VII sezine qatysýyńyz – zor mańyzy bar oqiǵa. Sizdiń sharaǵa arnaiy qatysýyńyz atalǵan forýmnyń tabysty bolýyna úlken septigin tigizedi. Jiyn qazirgi álemdegi kúrdeli kezeńde, daǵdarysty jaǵdaida ótip jatyr deýge bolady, – dedi Prezident.
Kezdesýden keiin joǵary mártebeli qonaqtyń korteji Aqordaǵa baǵyt aldy.
Buǵan deiin Rim Papasy mingen ITA Airways áýekompaniiasynyń AZ4000 reisi elorda áýejaiyna saǵat 17.18-de qonǵany habarlanǵan bolatyn.
