Qazaqstan Prezidenti Resei Úkimetiniń tóraǵasy Mihail Mishýstinmen kezdesti, dep habarlaidy "Ult aqparat" Aqordanyń resmi saityna silteme jasap.
Memleket basshysy Qazaqstan men Resei úkimet basshylarynyń ótkizgen kelissózderiniń qorytyndysyn joǵary baǵalady.
– Keshe Sizder óte mazmundy, tabysty kelissózder júrgizdińizder. Eki memlekettiń saýda-ekonomika salasyndaǵy ózara is-qimyldyń qarqyndy damyǵanyn atap ótkim keledi. Yntymaqtastyqty odan ári qarqyndy damytýǵa múmkindik beretin mańyzdy kelisimderge qol qoiýǵa daiyndyq júrip jatyr. Pandemiiaǵa bailanysty týyndap otyrǵan barlyq qiyndyqtarǵa qaramastan, eki el arasyndaǵy saýda ótken 5 aidyń ishinde 26 paiyzǵa artty, – dedi Qasym-Jomart Toqaev.
Qazaqstan Prezidenti bolashaqta ekonomikalyq bailanystardy arttyrýdyń áleýeti zor ekenine nazar aýdardy.
– Bizdiń josparymyz naqty jobalardy júzege asyrý arqyly yntymaqtastyǵymyzdy nyǵaita túsý. Qazirgi ýaqytta eki el úkimetteri mashina jasaý, aýyl sharýashylyǵy jáne basqa da asa mańyzdy salalarda iri jobalardy júzege asyrýǵa kúsh jumyldyrýda. Bul baǵyttaǵy jumystardy jalǵastyra berýimiz kerek. Sizdiń osy jumysqa degen qulshynysyńyzdy quptaimyn jáne tabysty bolatynyna senimdimin, – dedi Memleket basshysy.
Resei Premer-Ministri Mihail Mýshistin Qasym-Jomart Toqaevqa qonaqjailyǵy úshin alǵys bildirip, Prezident Vladimir Pýtinniń sálemin jetkizdi.
– Biz baýyrlas Qazaqstanmen aradaǵy dostyq, áriptestik jáne odaqtastyq qatynastarymyzdy joǵary baǵalaimyz. Úkimetterimiz arasyndaǵy bailanystardyń mazmuny tereń. Birlesip jumys jasaýǵa zor múmkindikter bar. Saýda-ekonomikalyq yntymaqtastyǵymyz jaqsy damyp keledi. Osy jyldyń birinshi jartyjyldyǵynda ózara taýar ainalymy úsh esege artty. Jyldyń sońyna deiin saýda ainalymynan óte joǵary kórsetkishter kútemiz jáne oǵan barlyq múmkindikter bar. Investitsiialyq baǵytta da ózara tabysty jumys istep jatyrmyz. Resei biznesi Qazaqstannyń 32 iri jobasyna qatysýda. Qazaqstandyq áriptesterimiz de Reseidiń jobalaryna belsendi atsalysyp jatyr, – dedi Mihail Mishýstin.
Áńgimelesý barysynda Qazaqstan men Reseidiń pandemiiaǵa qarsy kúres jáne birlesip vaktsina shyǵarý siiaqty ózara is-qimyldaǵy basym baǵyttar týraly sóz boldy.
Taraptar aimaqtar arasyndaǵy bailanystardyń oń qarqyny týraly da pikir almasty. Bul qatynastarǵa osy kúzde Kókshetaý qalasynda memleket basshylarynyń qatysýymen ótetin kezekti Aimaqaralyq yntymaqtastyq forýmy tyń serpin beredi.
