Memleket basshysy Qasym-Jomart Toqaev Resei Federatsiiasynyń Prezidenti Vladimir Pýtinmen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
XVIII Óńiraralyq yntymaqtastyq forýmynan keiin Qazaqstan men Resei prezidentteri kelissóz júrgizdi.
Qasym-Jomart Toqaev Vladimir Pýtinge Qazaqstan Prezidenti bolyp qaita sailanýymen quttyqtaǵany jáne izgi tilegi úshin alǵys aityp, eki el arasyndaǵy qarym-qatynasqa joǵary baǵa berdi.
– Eń aldymen, Qazaqstan Respýblikasynyń Prezidenti laýazymyna qaita sailanýyma orai jeke quttyqtaǵanyńyz úshin alǵys aitqym keledi. Shyn máninde, alǵashqy sheteldik saparym osy elge, Resei Federatsiiasyna jasalyp otyr. Munyń tereń saiasi máni bar. Álbette, bul sapardyń belgili bir simvoldyq máni bar. Ekinshi jaǵynan, bul qalypty jaǵdai, óitkeni memleketterimiz arasyndaǵy yntymaqtastyq týraly áńgime órbip otyr. Biyl biz diplomatiialyq qarym-qatynastyń ornaǵanyna 30 jyl tolǵanyn atap óttik. Búgin osy tarihi dataǵa arnalǵan Deklaratsiiaǵa qol qoiamyz – dedi Memleket basshysy.
Prezidenttiń aitýynsha, Qazaqstan men Resei arasyndaǵy saýda-ekonomikalyq bailanystar belsendi damyp keledi.
– Qazaqstan úshin Resei Federatsiiasy negizgi strategiialyq seriktes memleket bolady jáne solai bolyp qala beredi. Bizdi túrli saladaǵy tereń qarym-qatynastar bailanystyrady. Siz Óńiraralyq yntymaqtastyq forýmynyń kezekti otyrysyn meńzedińiz. Bul joly ol Orynborda ótip jatyr. Bizdiń odan ári ilgerilýimizge eleýli negiz bar. Bizdiń elderimiz arasyndaǵy saýda kólemi pandemiiaǵa bailanysty qiyndyqtarǵa qaramastan 24,5 milliard dollarǵa jetti. Resei kapitalynyń bizdiń elimizge baǵyttalýyna qatysty úlken josparymyz bar. Men Memleket basshysy retinde jáne bizdiń Úkimetimiz ózara tiimdi sharttar negizinde Resei kapitaly Qazaqstanda turaqty jumys isteýi úshin qolymyzdan kelgenniń bárin jasaimyz. Eki el arasyndaǵy yntymaqtastyqtyń damý deńgeiine kóńilimiz tolady deýge negiz bar. Sonymen qatar alǵa umtylý kerek, dál osy maqsatpen men osynda arnaiy saparmen keldim, – dedi Qasym-Jomart Toqaev.
Vladimir Pýtin Memleket basshysyn sailaýdaǵy senimdi jeńisimen jáne Prezident qyzmetine kirisýimen taǵy da quttyqtady.
– Eń aldymen, Qasym-Jomart Kemelulyna shyn júrekten iltipat bildiremin. Ol Qazaqstan Prezidenti bolyp qaita sailanǵannan keiingi alǵashqy resmi saparyn Reseige jasady. Men ony sailaýdaǵy senimdi jeńisimen taǵy da quttyqtaǵym keledi jáne eldiń saiasi, áleýmettik-ekonomikalyq ómirindegi aýqymdy ózgeristerge qatysty barlyq josparyn júzege asyrýda sáttilik tileimin, – dedi Resei basshysy.
Resei Prezidenti sondai-aq Qazaqstan men Resei arasyndaǵy bailanystardyń joǵary deńgeii men erekshe sipatyn atap ótti.
– Árine, Qazaqstan Prezidentimen jii kezdesip turamyz, jaqynda ǵana júzdesken bolatynbyz. Biz árqashan ár kezdesýimizde ózekti máselelerdi talqylaimyz. Eń aldymen, ekonomika máselesin kóteremiz. Óitkeni bul – bizdiń barlyq saladaǵy tabystarymyzdyń negizi. Biz ony joǵary baǵalaimyz. Jańa ǵana turaqty túrde ótetin Óńiraralyq forýmǵa qatystyq. Onda da bizdiń áriptester aitarlyqtai naqty nátijelerge qol jetkizetinine senimdimin, sebebi saýdanyń deni shekaralas aimaqtar arqyly ótedi. Adamdar bir-birimen aralasady, bir-biriniń múmkindikterin jaqsy biledi. Biz qazir 2021 jyly taýar ainalymynyń óskenin atap óttik. 2022 jyly da turaqty artyp keledi. Sondai-aq dástúrli baǵyttarda, joǵary tehnologiialyq salalarda jumys istep jatyrmyz, bul bolashaq úshin óte mańyzdy, – dedi Vladimir Pýtin.
Qazaqstan men Resei prezidentteri dástúrli túrde ózara senim men konstrýktivti negizde ekijaqty seriktestikti odan ári nyǵaitý joldaryn aiqyndady. Ónerkásiptik qatynastar men kólik-logistika salasyndaǵy ekonomikalyq is-áreketterdi kúsheitý basty mindet bolyp qala beredi.
Kezdesý sońynda Qasym-Jomart Toqaev pen Vladimir Pýtin diplomatiialyq qatynastardyń 30 jyldyǵyna orai Qazaqstan Respýblikasy men Resei Federatsiiasy arasyndaǵy Deklaratsiiaǵa qol qoidy.
