Memleket basshysy Qasym-Jomart Toqaev Peterbýrg halyqaralyq ekonomikalyq forýmynyń plenarlyq otyrysynan keiin Vladimir Pýtinmen kezdesý ótkizdi, dep habarlaidy "Ult aqparat" Aqordanyń resmi saityna silteme jasap.
Áńgime barysynda kóshbasshylar Qazaqstan men Reseidiń saýda-ekonomikalyq saladaǵy yntymaqtastyǵynyń qazirgi jaǵdaiy men damý perspektivalaryn jan-jaqty talqylady.
Qasym-Jomart Toqaev kúrdeli geosaiasi ahýalǵa qaramastan Qazaqstannyń mańyzdy strategiialyq seriktesi – Reseimen aradaǵy yqpaldastyqtyń qarqyndy damyp kele jatqanyn atap ótti.
– Qurmetti Vladimir Vladimirovich, men Sizdiń osy bedeldi forýmǵa qatysýǵa shaqyrýyńyzdy yqylaspen qabyldadym. Sizdiń baiandamańyzdy muqiiat tyńdadym. Mazmuny men kólemi jaǵynan bul baiandamańyz halyqqa arnalǵan tutas joldaýǵa teń keledi. Aýditoriia muny óte jyly qabyldady. Buǵan pikir bildirýshiler de az bolmaidy dep oilaimyn. Ekijaqty yntymaqtastyqqa keler bolsaq, alańdaýshylyqqa negiz joq. Bári qalypty jaǵdaida. Ónerkásip, aýyl sharýashylyǵy salalary boiynsha naqty jobalar júzege asyrylyp jatyr. Investitsiialyq yntymaqtastyq qarqyndy damyp keledi. Biyl erekshe jyl – diplomatiialyq qatynastarymyzǵa 30 jyl. Ekijaqty yntymaqtastyqty damytý turǵysynan eleýli jetistikterge qol jetkizdik. Bul baǵyttaǵy qarym-qatynastarymyz odan ári qarqyndy dami beredi dep oilaimyn, – dedi Memleket basshysy.
Óz kezeginde Resei Prezidenti eki el arasyndaǵy saýda-ekonomikalyq bailanystar odan ári nyǵaia beretinin aitty.
– Peterbýrg ekonomikalyq forýmyna kelgenińiz úshin kóp rahmet. Biz úshin elderimiz arasyndaǵy erekshe qatynastardy atap ótý jáne ózińizben negizgi baǵyttar jóninde, ásirese ekonomika salasy boiynsha pikir almasý mańyzdy. Jańa ǵana forým aiasynda osyny aittyq. Aitpaqshy, osy forýmda 7 milliard dep qate aityppyn. Qazaqstan ekonomikasyna salynǵan investitsiia 17 milliard dollar. Taýar ainalymy artyp keledi. Siz jańa ǵana bul týraly aityp óttińiz. Byltyr osy kórsetkish 25 milliard dollar bolsa, biyl alǵashqy úsh aida 12 milliardtan asqan. Eger osyndai qarqynmen dami berse, rekordtyq kórsetkishke qol jetkizemiz. Biyl elderimiz arasyndaǵy diplomatiialyq qatynastardyń ornaǵanyna 30 jyl. Aldymyzda óńirlik forým bar. Jalpy úkimetterimiz belsendi jumys júrgizip jatyr, – dedi Vladimir Pýtin.
