Memleket basshysy Qasym-Jomart Toqaev TMD-ǵa múshe memleketterdiń beiresmi sammiti aiasynda Resei Prezidenti Vladimir Pýtinmen kezdesý ótkizdi, dep habarlaidy Aqordanyń resmi saity.
Taraptar Qazaqstan men Resei arasyndaǵy strategiialyq seriktestiktiń túrli aspektilerin talqylady. Memleketter basshylary eki el arasyndaǵy saýda-ekonomikalyq qatynastardyń damýyna kóńilderi tolatynyn aitty. Sondai-aq bilim berý, tsifrlandyrý, energetika jáne basqa da salalardaǵy yqpaldastyqty nyǵaitý qajettigin atap ótti.
– Bilim berý salasyndaǵy kelisim – óte mańyzdy. MFTI jáne Baýman atyndaǵy Máskeý memlekettik tehnikalyq ýniversiteti siiaqty Reseidiń jetekshi joǵary oqý oryndarynyń filialdarynda mamandar daiarlaýǵa niettimiz, – dedi Qasym-Jomart Toqaev.
Óz kezeginde Vladimir Pýtin Qazaqstan Prezidentin kelesi jyldyń basynda Reseige saparmen kelýge shaqyrdy.
