Sochide ótip jatqan «Valdai» pikirtalas klýbyna qatysýǵa kelgen Qazaqstan Prezidenti Qasym-Jomart Toqaev Resei Prezidenti Vladimir Pýtinmen kezdesti, dep habarlaidy "Ult aqparat" Aqordaǵa silteme jasap.
Qazaqstan Prezidentin qurmetpen qarsy alǵan Vladimir Pýtin, Qasym-Jomart Toqaevtyń «Valdai» pikirtalas klýbynyń jumysyna qatysýyna Resei tarapy úlken mán berip otyrǵanyn aitty.
– Bizdiń shaqyrtýymyzdy qabyl alyp, «Valdai» pikirtalas klýbynyń jumysyna qatysýǵa kelgenińiz úshin rizashylyǵymdy bildiremin. Bizdi uzaq jyldar diplomatiialyq qyzmette istegen Siz sekildi adamnyń pikiri qatty qyzyqtyrady. Siz bul salada kásibi mamansyz. Búgingi halyqaralyq arenadaǵy jaǵdaiǵa, ásirese, qaýipsizdik salasyna bailanysty Sizdiń pikirińiz biz úshin óte paidaly ári qyzyq, – dedi Resei Prezidenti.
Vladimir Pýtin EAEO aiasyndaǵy birlesken jumystardyń belsendiligin atap ótti. Ol uiymdy damytý jónindegi birlesip sheshim qabyldaýda ózara senimniń joǵary deńgeige kóterilgenin aitty.
Resei Prezidentiniń aitýynsha, eki el arasyndaǵy dialog ta óte jemisti júrip jatyr.
– Bizdiń kún tártibindegi kez-kelgen eki jaqty máselelerdi talqylaýǵa múmkindigimiz bar. Barlyq sala boiynsha tabysty damý baiqalady. Taýar ainalymy da kóńilge qonymdy. Ártúrli baǵytta birlesken jobalarymyz iske asýda, onyń ishinde, dástúrli jáne joǵary tehnologiialar boiynsha yntymaqtasa áreket etýdemiz. Biz únemi zaman aǵymynyń tamyryn dóp basyp, ár saladaǵy áriptesterimizge ministrlik deńgeiinde qoldaý kórsetip kelemiz. Bul jumys jalǵasa beredi, – dedi Vladimir Pýtin.
Qasym-Jomart Toqaev Vladimir Pýtinge Sochige shaqyrǵany úshin alǵys aitty. Onyń oiynsha, «Valdai» pikirtalas klýby óte qyzyqty ári tartysty forým.
Qazaqstan Prezidenti reseilik áriptesine Jeńistiń 75 jyldyq mereitoiyna qatysýǵa shaqyrǵany úshin rizashylyǵyn bildirdi. Qasym-Jomart Toqaev mereitoi kúnderi Máskeýge barýǵa nietti ekenin jetkizdi.
– Men - maidangerdiń ulymyn. Jaqynda Ivanov oblysynda Uly Otan soǵysy kezinde qaza tapqan 73 qazaqstandyq maidangerdiń qabiri tabyldy. Biz, qazaqstandyqtar, Uly jeńis jolynda janyn qiǵan jaýyngerlerdiń erligin árdaiym este saqtaimyz, – dedi Qazaqstan Prezidenti.
Qasym-Jomart Toqaev Elbasy Nursultan Nazarbaev negizin qalaǵan Qazaqstan men Resei arasyndaǵy áriptestiktiń joǵary deńgeii men dárejesiniń saqtalǵanyn atap ótti.
– Ómir bir ornynda turmaidy, sol sebepti bizdiń ózara is-qimyldarymyzdy jańa mazmunmen tolyqtyryp, kún tártibine shyqqan máselelerdi der kezinde sheship otyrý kerek. Men mundai jumysqa daiynmyn. Bizdiń strategiialyq áriptestigimiz ben odaqtastyǵymyzdy jańa deńgeige kóteremiz degen oidamyn, – dep málimdedi Qasym-Jomart Toqaev.
Memleket basshysy Eýraziialyq ekonomikalyq odaq sheńberinde integratsiialyq protsester boiynsha joǵary deńgeidegi túsinistik baryn atady. Onyń aitýynsha, Erevanda ótken JEEK otyrysyndaǵydai týyndaǵan máseleler boiynsha ýaqytyly sheshimder qabyldanýy qajet.
