Máskeýge jumys saparymen barǵan Qazaqstan Prezidenti Qasym-Jomart Toqaev Resei Prezidenti Vladimir Pýtinmen kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
Memleketter basshylary ekijaqty qatynastardyń perspektivalaryn jáne aimaqtyq deńgeidegi yqpaldastyqtyń ózekti máselelerin talqylady.
Qazaqstan Prezidenti Máskeýge saparmen kelýge shaqyrǵany jáne dástúrli túrde qonaqjailyq kórsetkeni úshin Resei kóshbasshysyna rizashylyǵyn bildirdi.
– Vladimir Vladimirovich, eń aldymen, Máskeýge saparmen kelýge shaqyrǵanyńyz úshin alǵys aitamyn. Shyn máninde, bul - Jańa jyldan keiingi, ókinishke qarai, elimizde bolǵan qańtardaǵy qaiǵyly oqiǵalardan keiingi alǵashqy saparym. Bul elimizdiń konstitýtsiialyq qurylysyna nuqsan keltirip, memlekettik tóńkeris jasaý maqsatymen Qazaqstanǵa shabýyl jasaǵan halyqaralyq lańkester men buzaqylardyń muqiiat daiyndaǵan operatsiiasy boldy. Qazir tergep-tekserý jumystary júrgizilip jatyr. Alǵashqy nátijeleri de bar. Ókinishke qarai, qurban bolǵandardyń sany óte kóp. Bul meniń de janyma batady. Qaza bolǵandardyń jaqyndary men týystaryna kóńil aittym. Árbir jaǵdai jiti tekseriledi. Kináliler anyqtalyp, jaýapqa tartylady. Elimizge bitimgerlik kúshterin jiberý jónindegi Qazaqstannyń úndeýine jyly ári iskerlikpen qaraǵanyńyz úshin Sizge taǵy da rizashylyǵymdy bildiremin. Bitimgerlik kontingent strategiialyq nysandardy kúzetý turǵysynan óte mańyzdy ról atqardy, – dedi Qasym-Jomart Toqaev.
Vladimir Pýtin qańtardaǵy qaiǵyly oqiǵalarǵa qatysty óziniń pikirin bildirdi.
– Qazaqstandy el ishindegi kúrdeli jaǵdaidy paidalanǵan qandai da bir halyqaralyq búlikshilerdiń qurbany boldy desek, artyq aitqandyq emes. Resei Ujymdyq qaýipsizdik týraly shart uiymyna múshe memlekettiń biri retinde Sharttyń 4-babyna sáikes Qazaqstanǵa kómek qolyn sozdy. Degenmen, Qazaqstan basshylyǵy negizgi ról atqardy, sondai-aq ózderiniń isine, antyna jáne halqyna adal quqyq qorǵaý organdary men qarýly kúshter ózderine júktelgen mindetti oryndady. Osy oqiǵalar kezinde qiraǵan nysandardy qalpyna keltirý úshin kóp kúsh jumsaý qajet ekenin de bilemin. Biraq Qazaqstan Sizdiń tabandylyǵyńyzdyń arqasynda nyq tur jáne Sizdiń basshylyǵyńyzben belsendi damýda, – dedi Resei Prezidenti.
Prezidentter eki el arasyndaǵy jan-jaqty bailanystardyń tabysty damýyn joǵary baǵalap, saiasi, ekonomikalyq, saýda, investitsiialyq jáne mádeni-gýmanitarlyq qarym-qatynastardy tereńdetýge eki taraptyń da múddeli ekenin aitty.
– Aldaǵy kelissóz barysynda Qazaqstannyń jáne eki eldiń de strategiialyq múddelerin qamtityn birqatar ózekti másele boiynsha pikir almasýdy josparlap otyrmyz. Mańyzdy kelisimge qol qoiyldy. Jalpy, saiasi erik-jiger bar, ózara strategiialyq, odaqtastyq qarym-qatynastar boiynsha naqty nátijege qol jetkizemiz dep oilaimyn. Budan buryn da Qazaqstan men Reseidiń Qudai qosqan kórshi ekenin aitqanbyz. Álemdegi eń uzyn qurlyqtyq shekara da bizge tiesili. Elderimiz arasynda dostyq pen yntymaqtastyqtan basqa qarym-qatynas bolýy múmkin emes, – dedi Qazaqstan Prezidenti.
Resei basshysy eki el arasyndaǵy ekonomikalyq yqpaldastyqty arttyrýǵa nietti ekenin málimdedi.
– Resei Qazaqstannyń iri saýda-ekonomikalyq seriktesi ekenine qýanyshtymyn. Halyqaralyq alańdarda da tyǵyz yntymaqtastyq ornatqanbyz, burynǵy Keńestik keńistikten tys iri halyqaralyq uiymdarda da yqpaldastyǵymyz bar. Biyl diplomatiialyq qatynastardy ornatqanymyzǵa – 30 jyl. Birqatar kólemdi is-shara ótkizý kózdelip otyr. Olar bizdiń iskerlik, gýmanitarlyq bailanystarymyzǵa paidaly bolatynyna senimdimin. Ǵarysh, energetika, mashina jasaý salalaryndaǵy iri jobalar boiynsha birlesip atqaratyn jumys kóp, – dedi Vladimir Pýtin.
Qazaqstan men Resei basshylarynyń kezdesýi barysynda bilim berý salasyndaǵy yntymaqtastyqqa basa mán berildi. Injenerlik-tehnikalyq saladaǵy joǵary bilikti mamandardyń tapshylyǵyna bailanysty Qazaqstanda Reseidiń jetekshi joǵary oqý oryndarynyń filialdaryn ashý jáne «Bolashaq» baǵdarlamasy aiasynda Reseide mamandar ázirleý jóninde ýaǵdalastyqqa qol jetkizildi.
Kelissóz qorytyndysy boiynsha bilim berý, temirjol, tsifrlandyrý, ǵaryshty igerý jáne atom energetikasy salalary boiynsha mamandar daiarlaýǵa qatysty birqatar qujatqa qol qoiyldy.
Qol qoiylǵan qujattar tizimi:
1. Qazaqstan Respýblikasy Tsifrlyq damý, innovatsiialar jáne aeroǵarysh ónerkásibi ministrligi men Resei Federatsiiasy Tsifrlyq damý, bailanys jáne buqaralyq kommýnikatsiialar ministrligi arasyndaǵy tsifrlandyrý salasyndaǵy tájiribe almasý jónindegi ózara túsinistik týraly memorandým.
2. Qazaqstan Respýblikasy Tsifrlyq damý, innovatsiialar jáne aeroǵarysh ónerkásibi ministrligi men «Roskosmos» ǵarysh qyzmeti memlekettik korporatsiiasy arasyndaǵy Jerdi qashyqtan zondtaý ǵarysh apparattarynyń derekterimen almasý jónindegi ózara túsinistik týraly memorandým.
3. Qazaqstan Respýblikasy Energetika ministrligi men «Rosatom» atom energiiasy memlekettik korporatsiiasy (Resei Federatsiiasy) arasyndaǵy Qazaqstan Respýblikasynyń atom energiiasyn beibit maqsatta paidalaný salasyndaǵy qadrlardy daiarlaý jónindegi ózara túsinistik týraly memorandým.
4. Qazaqstan Respýblikasy Bilim jáne ǵylym ministrligi men Resei Federatsiiasy Ǵylym jáne joǵary bilim ministrligi arasyndaǵy ózara túsinistik týraly memorandým.
5. «Qazaqstan temir joly» UK» AQ jáne «Transmashholding» AQ arasyndaǵy ózara yntymaqtastyq týraly kelisim.
6. «Halyqaralyq baǵdarlamalar ortalyǵy» aktsionerlik qoǵamy (Qazaqstan Respýblikasy) men «N.E.Baýman atyndaǵy Máskeý memlekettik tehnikalyq ýniversiteti» federaldyq memlekettik avtonomdy joǵary oqý orny arasyndaǵy ózara túsinistik týraly memorandým.
7. «Halyqaralyq baǵdarlamalar ortalyǵy» aktsionerlik qoǵamy (Qazaqstan Respýblikasy) men «MISiS» Ulttyq tehnologiialyq zertteý ýniversiteti» federaldyq memlekettik avtonomdy joǵary bilim berý mekemesi (Resei Federatsiiasy) arasyndaǵy ózara túsinistik týraly memorandým.
8. «Halyqaralyq baǵdarlamalar ortalyǵy» aktsionerlik qoǵamy (Qazaqstan Respýblikasy) men «MIFI» ulttyq iadrolyq zertteý ýniversiteti» federaldyq memlekettik avtonomdy joǵary bilim berý mekemesi arasyndaǵy ózara túsinistik týraly memarandým.
9. «Halyqaralyq baǵdarlamalar ortalyǵy» aktsionerlik qoǵamy (Qazaqstan Respýblikasy) men «Máskeý fiziko-tehnikalyq inistitýty» federaldyq memlekettik avtonomdy joǵary bilim berý mekemesi arasyndaǵy ózara túsinistik týraly memorandým.
10. «Halyqaralyq baǵdarlamalar ortalyǵy» aktsionerlik qoǵamy (Qazaqstan Respýblikasy) men «I.M.Gýbkin atyndaǵy Resei Memlekettik munai jáne gaz ýniversiteti (Ulttyq zertteý ýniversiteti)» federaldyq memlekettik avtonomdy joǵary bilim berý mekemesi arasyndaǵy ózara túsinistik týraly memorandým.
11. «Halyqaralyq baǵdarlamalar ortalyǵy» aktsionerlik qoǵamy (Qazaqstan Respýblikasy) men «Naqty mehanika men optika institýty» ulttyq zertteý ýniversiteti» federaldyq memlekettik avtonomdy joǵary bilim berý mekemesi arasyndaǵy ózara túsinistik týraly memorandým.
