Memleket basshysy Qasym-Jomart Toqaev Prezidenttiń jaqyn týystaryna qandai tyiym salynatynyn aitty, - dep habarlaidy Tengrinews.kz tilshisi.
"Memleket basshysy barlyq azamattar úshin múmkindikter teńdiginiń myzǵymas kepili bolýy tiis. Sondyqtan Prezidenttiń jaqyn týystary úshin kvazimemlekettik sektordaǵy saiasi memlekettik qyzmetshiler men basshylar laýazymdaryna ornalasýǵa zańnamalyq tyiym engiziletin bolady", - dedi Prezident.
Sonymen qatar, Prezident Memleket basshysynyń oblystar, respýblikalyq mańyzy bar qalalar ákimderiniń aktileriniń kúshin joiýǵa nemese qoldanylýyn toqtata turýǵa quqyǵy baryn aitty.
"Bul norma "qolmen basqarýdyń" artyq tájiribesin ornyqtyrýǵa yqpal etedi jáne jergilikti atqarýshy organdardyń derbestigin tómendetedi. Sonymen qatar, qazir Prezident aýdan, tipti aýyl ákimderin qyzmetinen alyp tastaýǵa quqyly. Mundai zańnamalyq erejelerdi joiý qajet", - dedi Prezident.
