sýret: Azattyq
Memleket basshysy Qasym-Jomart Toqaev Almaty oblysy Penjim aýylyndaǵy tártipsizdikke qatysty pikir bildirdi, dep habarlaidy "Ult aqparat" Aqordanyń baspasóz qyzmetine silteme jasap.
"Mektepte jai ǵana tóbeles boldy. Buǵan jol bermeý kerek edi. Oqýshylardyń mektep ishinde júrip jaraqat alýy – tótenshe jaǵdai! Azamattarymyzdyń narazylyǵyq bildirgeni oryndy, olardy túsinýge bolady. Odan keiin jastar arasynda buzaqylyqqa jol berildi. Biraq mundai jaǵdaidyń aldyn alýǵa bolar edi. Degenmen, áreket bolmady. Aqparattyq keńistikte osy oqiǵa etnosaralyq sipat aldy. Bul jerde eshqandai da etnosaralyq janjal bolǵan joq! Alaida elimizge qarsy arańdatýshylar men qaskóiler atalǵan oqiǵany basqa sipatta kórsetti. Ókinishtisi, quqyq qorǵaý organdarynyń da, Prezident Ákimshiliginiń de tarapynan mundai arańdatýshylarǵa qatysty esh áreket jasalmady. Biz shara qoldanbaimyz ba? Mundai arańdatýshylar elimizdiń ulttyq qaýipsizdigine nuqsan keltirýde. Sondyqtan osy oqiǵadan durys sheshim shyǵarýymyz kerek", - dedi Prezident monoqalalardy damytý jónindegi respýblikalyq keńeste sóilegen sózinde.
Memleket basshysy qoǵamda túrli etnostar men konfessiialar ókilderiniń tatý kórshilik jáne beibit qatar ómir súrý dástúrin nyǵaitý, joǵaryda atalǵan oqiǵalarǵa mán berý algoritmderin ázirleý qajettigin atap ótti. Sondai-aq, elimizdiń biregeiligine, onyń ishinde áleýmettik jeliler men messendjerler arqyly nuqsan keltirýge jáne ulttyq qaýipsizdikke ziianyn tigizýge baǵyttalǵan kez kelgen áreketterge quqyq qorǵaý organdary tarapynan shara qoldanylatynyn aitty.
