Foto: Akorda.kz
Qasym-Jomart Toqaev pen Emmaniýel Makron eki memlekettiń resmi delegatsiialarynyń qatysýymen keńeitilgen quramda kelissóz júrgizdi, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Frantsiia Prezidentiniń Astanaǵa alǵashqy sapary ekijaqty qarym-qatynasty damytýǵa tyń serpin beretinin jáne kópjaqty yntymaqtastyqty múlde jańa deńgeige shyǵarýǵa múmkindik jasaitynyn atap ótti.
– Frantsiia – Qazaqstannyń Eýropa Odaǵyndaǵy mańyzdy ári senimdi seriktesi. Byltyr ózara taýar ainalymy 30 paiyzǵa ósip, 4 milliard dollarǵa jetti. Biylǵy segiz aida ekijaqty saýda-sattyq kólemi ótken jylmen salystyrǵanda 21 paiyzǵa artty, iaǵni 2,7 milliard dollardy qurady, – dedi Prezident.
Memleket basshysynyń aitýynsha, Frantsiia buǵan deiin el ekonomikasyna shamamen 18,7 milliard dollarǵa jýyq investitsiia salǵan. Energetika, qurylys, aeroǵarysh, farmatsevtika, taý-ken jáne himiia ónerkásibi, mashina jasaý salalarynda birlesken jobalar júzege asyrylyp jatyr.
Osy rette Qasym-Jomart Toqaev Emmaniýel Makronnyń ózara tiimdi qarym-qatynastardy damytýǵa qosqan jeke úlesin erekshe atap ótip, eki el halyqtarynyń igiligi jolyndaǵy yntymaqtastyqty odan ári nyǵaitýǵa Qazaqstannyń daiyn ekenin jetkizdi.
Kelissóz barysynda taraptar jasyl energetika, logistika, tranzit, aýyl sharýashylyǵy, densaýlyq saqtaý, tsifrlandyrý jáne bilim berý salalaryndaǵy aldaǵy yqpaldastyqtyń basym baǵyttaryn aiqyndady.
Memleket basshysy mádeni bailanystardy damytýǵa erekshe nazar aýdaryp, frantsýz mádenieti men tilin Qazaqstanda ilgeriletý qajet ekenin aitty.
Óz kezeginde Emmaniýel Makron eki el arasyndaǵy Strategiialyq áriptestik týraly kelisimniń qabyldanǵanyna 15 jyl tolǵanyn atap ótip, Frantsiianyń ózara múddeni kózdeitin túrli saladaǵy ekijaqty bailanystardy odan ári nyǵaitýǵa nietti ekenin rastady.
– Ekijaqty ekonomikalyq qarym-qatynastar, sonyń ishinde aýyl sharýashylyǵy, energetika, jańartylatyn energetika salalaryndaǵy bailanystar aldaǵy ýaqytta tyń serpinmen damidy dep oilaimyn. Biz burynǵy jobalarǵa da, jańa bastamalarǵa da investitsiia salýdy qoldaimyz. Búgin óte ózekti máselelerdi talqyladyq. Budan bólek mádeni-gýmanitarlyq yntymaqtastyǵymyz da qarqyndy damyp keledi. Bilim-ǵylym salalarynda naqty kelisim bar. 2024 jyldyń qyrkúiek aiynda Qazaq-frantsýz ýniversiteti óz jumysyn bastaidy, – dedi Frantsiia Prezidenti.
Sonymen qatar eki el basshylary óńirlik jáne jahandyq kún tártibindegi negizgi máselelerge qatysty turaqty qarym-qatynastyń mańyzdylyǵyna nazar aýdaryp, halyqaralyq uiymdar aiasyndaǵy dialogty tereńdetý qajet ekenin atap ótti.
