Qazaqstan Prezidentiniń Ázerbaijanǵa resmi saparynyń baǵdarlamasy memleket basshylarynyń keńeitilgen qurammen ótken kelissózimen jalǵasty, dep habarlaidy "Ult aqparat" Aqordaǵa silteme jasap.
Qasym-Jomart Toqaev pen Ilham Áliev qazaq-ázerbaijan strategiialyq seriktestiginiń negizgi máselelerin talqylap, saiasi, saýda-ekonomikalyq, kólik-tranzittik jáne mádeni-gýmanitarlyq yntymaqtastyqty nyǵaitýǵa erekshe nazar aýdardy.
Qazaqstan Prezidenti Bakýǵa shaqyrǵany jáne kórsetilgen qonaqjailylyq úshin taǵy da rizashylyǵyn bildirdi.
– Men shaǵyn quramdaǵy kezdesýge óte rizamyn, onda biz memleketterimizdiń ózara is-áreketiniń barlyq máseleleri men ártúrli salalary týraly jan-jaqty pikir almastyq. Qazaqstan men Ázerbaijan – jaqyn memleketter, biz strategiialyq seriktespiz jáne odaqtaspyz. Búgin elderimiz arasyndaǵy strategiialyq qatynastardy nyǵaitý jáne odaqtastyq ózara is-qimyldy tereńdetý týraly Deklaratsiiaǵa qol qoiylady, – dedi Memleket basshysy.
Qasym-Jomart Toqaev Ázerbaijanǵa ekijaqty yntymaqtastyqty jańa deńgeige shyǵarý úshin arnaiy missiiamen kelgenin aitty. Qazaqstan Prezidenti ekijaqty saýda-ekonomikalyq bailanystardy damytý máselelerine egjei-tegjeili toqtaldy.
– Keiingi jyldary taýar ainalymynyń aitarlyqtai, úsh esege jýyq óskenine qýanyshtymyn. Biraq bul, árine, jaibaraqat júrýge negiz emes ekenin atap ótkim keledi. Saýdany arttyrýǵa múmkindikter bar dep esepteimin. Bizdiń úkimetterimiz jaqyn arada elderimiz arasyndaǵy taýar ainalymyn 1 milliard dollarǵa deiin ulǵaitý úshin jumys isteýi kerek, – dedi Memleket basshysy.
Sondai-aq Qazaqstan Prezidenti gýmanitarlyq yntymaqtastyqty damytýdyń qolaily perspektivalaryna nazar aýdardy.
– Meniń oiymsha, kelesi jyly eki el úkimetteri arasyndaǵy kelisim boiynsha biz Qazaqstanda Ázerbaijan mádenietiniń onkúndigin ótkize alamyz. Sizdiń elińizdiń mádeniettine úlken qyzyǵýshylyq bar. Biz ázerbaijan mádenietiniń kórnekti ókilderin óz elimizde úlken iltipatpen qabyldaimyz, - dedi Qasym-Jomart Toqaev.
Ilham Áliev Qazaqstan Prezidentine Ázerbaijanǵa kelýge shaqyrýdy qabyl alǵany úshin alǵys aitty.
– Qurmetti Qasym-Jomart Kemeluly, men sizdi taǵy da shyn júrekten qarsy alyp, qosh keldińiz degim keledi. Shaqyrýdy qabyl alyp, bizge resmi saparmen kelgenińiz úshin alǵysymdy bildiremin. Bul sapar bizdiń qarym-qatynasymyzdyń damýynyń bolashaǵy úshin úlken mańyzǵa ie bolatynyna senimdimin. Eń aldymen, meni Qazaqstan Respýblikasynyń eń joǵary «Altyn Qyran» ordenimen marapattaǵanyńyz úshin resmi delegatsiianyń aldynda sizge taǵy da alǵys aitamyn. Bul syilyqty qabyl alý - men úshin úlken mártebe. Men muny bizdiń halyqtarymyzdyń dostyǵy men baýyrlastyǵynyń dáleli jáne Ázerbaijannyń qarym-qatynasymyzdy nyǵaitý baǵytynda jasap jatqan jumystaryna berilgen joǵary baǵa dep bilemin. Sondai-aq Qazaqstannyń Ázerbaijanǵa syilyǵy – azat etilgen aýmaqtarda salynatyn balalardyń shyǵarmashylyq damý ortalyǵynyń tusaýkeseri ótti. Bul halqymyzǵa degen baýyrmaldyq kózqarastyń taǵy bir kórinisi, Qarabaqty qalpyna keltirýge qosqan úles», – dedi Ázerbaijan Prezidenti.
Ázerbaijan basshysy búgin ekijaqty qarym-qatynastardyń keń aýqymdy kún tártibi men halyqaralyq máseleler boiynsha jan-jaqty áńgime bolǵanyn atap ótti.
– Árine, kólik-logistika infrraqurylymyn damytý jóninde úlken josparymyz bar. Qazaqstanda da, Ázerbaijanda da osy infraqurylymdy qurý boiynsha ýaqtyly sharalar qabyldandy. Qazir elderimiz arasyndaǵy júk tasymalynyń kólemin jáne kólik tranzitin arttyrý jóninde bastama kóterilip jatyr. Tiisti organdar bul baǵytta ózara belsendi jumys atqaryp otyr. Saýda-ekonomikalyq qatynasty damytýǵa da tyń serpin beretinimizge senimdimin. Taýar ainalymyn arttyrýdaǵy rezervimiz aitarlyqtai kóp. Búgin biz keleshektegi saýda-ekonomikalyq yntymaqtastyǵymyzdyń birqatar baǵyty boiynsha pikir almastyq. Ózara taýar jetkizý kólemin arttyrý josparyn naqtylai alamyz. Sondai-aq investitsiia salasynda zor múmkindigimiz bar. Qazaqstanda da, Ázerbaijanda da qolaily investitsiialyq klimat qalyptasqan. Sheteldik investitsiianyń kólemi úlken. Osy baǵyttaǵy kúsh-jigerimizdi biriktirip, Qazaqstan men Ázerbaijandaǵy, sonymen qatar ózge de elderdegi birlesken investitsiialyq jobalarǵa qatysatyn ýaqyt keldi dep oilaimyn, – dedi Ilham Áliev.
Sonymen qatar Ázerbaijan Prezidenti jaqynda Sýmgait qalasynyń ortalyq kósheleriniń birine qazaq halqynyń kórnekti aqyny, aǵartýshy, túrkitanýshy Ahmet Baitursynovtyń esimi berilgenin eske saldy. Ol baýyrlas eki el arasyndaǵy qarym-qatynas tabysty damitynyna senim bildirdi.
Kelissózderdiń qorytyndysy boiynsha Prezidentter Qasym-Jomart Toqaev pen Ilham Áliev Qazaqstan Respýblikasy jáne Ázerbaijan Respýblikasy arasyndaǵy strategiialyq qatynastardy nyǵaitý jáne odaqtastyq ózara is-qimyldy tereńdetý týraly Deklaratsiia jáne Qazaqstan Respýblikasy men Ázerbaijan Respýblikasy arasyndaǵy 2022-2026 jyldarǵa arnalǵan yntymaqtastyqty damytý jónindegi keshendi baǵdarlamaǵa qol qoidy.
Sondai-aq Memleketter basshylary BAQ ókilderi úshin brifing ótkizdi.
Qazaqstan Prezidentiniń Bakýge resmi sapary barysynda kelesi qujattarǵa qol qoiyldy:
1. Qazaqstan Respýblikasy jáne Ázerbaijan Respýblikasy arasyndaǵy strategiialyq qatynastardy nyǵaitý jáne odaqtastyq ózara is-qimyldy tereńdetý týraly Deklaratsiia
2. Qazaqstan Respýblikasy men Ázerbaijan Respýblikasy arasyndaǵy 2022-2026 jyldarǵa arnalǵan yntymaqtastyqty damytý jónindegi keshendi baǵdarlama
3. Qazaqstan Respýblikasynyń Úkimeti men Ázerbaijan Respýblikasynyń Úkimeti arasyndaǵy saýda-ekonomikalyq yntamaqtastyq týraly kelisim
4. Qazaqstan Respýblikasynyń Syrtqy ister ministrligi jáne Ázerbaijan Respýblikasynyń Syrtqy ister ministrligi arasyndaǵy 2023-2024 jj. arnalǵan Yntymaqtastyq jospary
5. Qazaqstan Respýblikasynyń Mádeniet jáne sport ministrligi men Ázerbaijan Respýblikasynyń Mádeniet ministrligi arasyndaǵy mádeni yntymaqtastyq jónindegi 2022-2025 jyldarǵa arnalǵan baǵdarlama
6. Túrkistan qalasy men Shýsha qalasy arasynda baýyrlas qarym-qatynastardy ornatý týraly hattama
7. Qazaqstan Respýblikasynyń Aqparat jáne qoǵamdyq damý ministrligi men Ázerbaijan Respýblikasynyń Mediany damytý agenttigi arasyndaǵy ózara túsinistik týraly memorandým
8. Qazaqstan Respýblikasynyń Tsifrlyq damý, innovatsiialar jáne aeroǵarysh ónerkásibi ministrligi men Ázerbaijan Respýblikasynyń Tsifrlyq damý jáne kólik ministrligi arasynda aqparattyq-kommýnikatsiialyq jáne joǵary tehnologiialar salasyndaǵy yntymaqtastyq boiynsha ózara túsinistik týraly memorandým
9. Qazaqstan Respýblikasynyń Indýstriia jáne infraqurylymdyq damý ministrligi men Ázerbaijan Respýblikasynyń Tsifrlyq damý jáne kólik ministrligi arasyndaǵy kólik salasyndaǵy yntymaqtastyq týraly ózara túsinistik týraly memorandým
10. Qazaqstan Respýblikasynyń Indýstriia jáne infraqurylymdyq damý ministrligi men Ázerbaijan Respýblikasynyń Tsifrlyq damý jáne kólik ministrligi arasyndaǵy tranzittik júk tasymaly salasyndaǵy yntymaqtastyq týraly ózara túsinistik týraly memorandým
