Prezident Qasym-Jomart Toqaev jeke óziniń jáne qazaqstandyqtardyń atynan Ózbekstan prezidenti Shavkat Mirziioevti jáne ózbek halqyn el Táýelsizdiginiń 30 jyldyǵymen quttyqtady, - dep habarlaidy "Ult aqparat" Aqorda saityna silteme jasap.
"Baýyrlas Ózbekstan bul aitýly kúnge ulttyq birtutastyǵymen, ekonomikalyq damýynyń joǵary qarqynymen jáne álemdik qoǵamdastyqta laiyqty bedelimen qýatty ári órkendegen memleket retinde jetip otyr. Ózbek halqy Sizdiń jasampazdyq saiasatyńyz ben tabysty júzege asyp jatqan aýqymdy reformalaryńyzdy qoldai otyryp, turaqty damý jolyn jalǵastyra beretinine senimdimin", - dep jazylǵan Memleket basshysynyń jedelhatynda.
Qasym-Jomart Toqaev eki el arasyndaǵy tarihy tereń strategiialyq yntymaqtastyqqa joǵary baǵa berdi.
"Sizben birlesip atqaryp jatqan jumysymyz ekijaqty deńgeide de, aimaqtyq jáne halyqaralyq yntymaqtastyq aiasynda da Qazaqstan men Ózbekstannyń ózara is-qimylyndaǵy zor áleýetti tolyq iske asyrý úshin qyzmet etetinine senimdimin", - delingen jedelhatta.
