Qazaqstan Prezidenti volonterlik jobalardy úilestiretin ári qoǵamdyq monitoring jasaityn jáne volonterlikti búkil elimiz boiynsha oqytyp, nasihattaityn front-ofistiń jumysymen tanysty. Sondai-aq Memleket basshysyna «Qazvolunteer.kz» onlain-platformasy kórsetildi, dep habarlaidy "Ult aqparat" Aqordaǵa silteme jasap.
Qasym-Jomart Toqaev óz sózinde Volonter jylynda kóptegen aýqymdy jobalar qolǵa alynatynyn atap ótti.
– Igi ispen ainalysý, adamdarǵa jaqsylyq jasaý – kóne zamannan kele jatqan dástúr. Bul dástúrdi mindetti túrde saqtap qalýymyz kerek. Sebebi bireýge qol ushyn sozyp, qoldaý kórsetý – qanymyzǵa sińgen qasiet. Halqymyzda osyndai bereke-birlikke shaqyratyn ASAR dástúri bar. Bul – ǵasyrlar boiy qundylyǵyn joimaǵan ata saltymyz. «Jumyla kótergen júk jeńil» deidi halqymyz. Volonterlik qyzmettiń basty maqsaty da – birge jumylyp, halyqqa qyzmet etý, – dedi Memleket basshysy.
Prezident qiyn-qystaý ýaqytta Qazaqstanǵa jer aýdarylyp kelgen kóptegen ult ókilderin qazaq halqy baýyryna basyp, bir úzim nanymen bóliskenin atap ótti.
– Volonterlik naqty istermen kórinetin patriotizmniń joǵary deńgeiin bildiredi. Otanǵa degen mahabbat - úlken urandar men bos deklaratsiialar emes, bul – kúndelikti eńbek, sonyń ishinde halyqtyń igiligi úshin shynaiy atqarylatyn qaiyrymdy ister. Bul – kúndelikti eńbek, bul – adamnyń bolmysy, bul – tereń bilim, joǵary minez-qulyq mádenieti. Ózgeniń dúnie-múlkine qol suǵatyn, tonaýshylyqpen ainalysatyn, jalǵan patriottyq urandardy taratatyn adamdar patriot emes ekenin túsinýimiz kerek. Mundai adamdar zań buzǵan bolyp sanalady, iaǵni, olar – qylmyskerler, qylmystyq elementter. Sondyqtan olar qoǵam men memleket aldynda zańǵa sáikes jaýap berýi tiis, – dedi Qasym-Jomart Toqaev.
Onyń aitýynsha, patriotizm, qoǵamǵa qyzmet etý jáne igilikti is – adamnyń tulǵalyq jáne rýhani damýynyń joǵary deńgeiiniń jarqyn kórinisi.
– Volonterlik qyzmet reformalardy júzege asyrýda, jalpy memleketimizdi jańǵyrtýda mańyzdy ról atqarady. Iaǵni, volonterler ózderiniń is-áreketimen asa mańyzdy reformalardy júzege asyrýǵa naqty úles qosady. Eńbekqorlyq, álemge ashyqtyq arqyly biz ozyq tehnologiiaǵa jáne joǵary eńbek ónimdiligine negizdelgen jańa ekonomika qura alamyz. Volonterlik ideiasyn belsendi ilgeriletý otandastarymyzdyń oi-sanasynyń jańa paradigmasyn jańǵyrtýǵa yqpal etetin bolady, – dep atap ótti Qazaqstan Prezidenti.
Qasym-Jomart Toqaev volonterler aldynda sóilegen sózinde belsendi uiymdardy atap ótti. Atap aitqanda ol qiyn turmystyq jaǵdaiǵa tap bolǵan adamdarǵa kómek qolyn sozýǵa daiyn myńdaǵan belsendileri bar ulttyq eriktiler jelisiniń, «Lider.kz», «Best for kids», elordalyq «28 petel» klýby men «Qamqorshylar klýbynyń» jumysyna joǵary baǵa berdi.
– Qazaqstanda volonterliktiń birte-birte jalpyulttyq sipatqa ie bolyp kele jatqanyn kórip otyrmyz. Bul úderis Volonter jylynda atqarylatyn is-sharalardyń arqasynda azamattarymyzdy odan ári biriktire túsetinine senimdimin. Igi ister bizdiń mádeni biregeiligimizdiń ajyramas bóligine ainaldy. Elimizde 200-den astam volonterlik uiym bar. Onda 50 myńnan astam eriktiler jumys isteidi, – dedi Memleket basshysy.
Qasym-Jomart Toqaev Qazaqstan azamattaryn jahandyq jáne aimaqtyq máselelerdi sheshetin halyqaralyq volonterlik bastamalarǵa belsendi túrde tartýdy usyndy.
– Qazaqstan 116 eldiń 20 millionnan astam eriktilerin biriktiretin Dúniejúzilik ekologiialyq «World Clean up day» naýqanyna qosylýǵa daiyn. Otandastarymyzdyń BUU, IýNISEF, AIESEC uiymdarynyń eriktilik baǵdarlamalaryna jáne basqa da halyqaralyq bastamalarǵa atsalysýy ártúrli memleketterdiń tájiribesimen tanysýǵa jáne elimizge úzdik volonterlik tájiribeni tartýǵa múmkindik beredi, – dedi Prezident.
Prezidenttiń pikirinshe, memleket volonterliktiń infraqurylymyn qalyptastyrýǵa qoldaý kórsetýi tiis. Onyń ishinde, aimaqtyq front-ofister barlyq eriktilerge óz ideialaryn nemese naqty volonterlik jobalaryn iske asyrýǵa kómektesýi qajet.
– Volonter jyly – kezekti naýqan emes. Osyny halyqqa túsindirýimiz kerek. Eriktilik – el úshin, qoǵam úshin adal qyzmet. Volonterlik halqymyzdyń ómir saltyna ainalýy kerek. Ony táýelsiz Qazaqstannyń búgingi jáne bolashaq sipaty retinde dáripteýimiz qajet. Eriktilerdiń boiyndaǵy qairat-jiger ár azamatty yntalandyrýy tiis. Elimizdegi ár aýyl-aimaq osy mańyzdy jumystan tys qalmaidy dep senemin, – dedi Memleket basshysy.
Is-shara sońynda Qazaqstan Prezidentine «Birgemiz: Asyl mura», «Birgemiz: Bilim», «Birgemiz: Saýlyq», «Birgemiz: Sabaqtastyq», «Birgemiz: Taza Álem», «Birgemiz: Úmit» sekildi jobalar tanystyryldy.
