Qazaqstan azamattarynyń reformalary men usynystary úshin onlain petitsiia jasaityn biryńǵai zańdy institýt qurylady. Bul týraly Memleket basshysy Qasym-Jomart Toqaev málimdedi, dep habarlaidy "Ult aqparat".
"Áleýmettik jelilerdiń arqasynda jergilikti jerlerde sheshimin tappaǵan máseleler búkil elge belgili bolyp jatyr. Azamattardyń reformalary men usynystary úshin onlain petitsiia jasaityn biryńǵai zańdy institýt qurý qajet. Mundai mehanizm qandai da bir manipýliatsiiadan tolyǵymen ada bolýy tiis. Úkimettiń aldynda azamattyq qoǵammen birlesip, normativtik-quqyqtyq baza ázirlep, osy mańyzdy jobaǵa qatysty barlyq tehnikalyq máseleni sheshý mindeti tur", - dedi Toqaev Parlament palatalarynyń birlesken otyrysynda jyl saiynǵy Joldaýyn jariia etip.
Prezidenttiń pikirinshe, máslihattarǵa óńirdi damytý nemese jergilikti problemalarǵa qatysty petitsiia jasaý jáne qol jinaý fýnktsiiasyn berý qajet. Sonymen qatar, máslihattardyń reviziialyq komissiialaryn da kúsheitý kerek.
"Úkimet pen esep komitetine zańnamaǵa tiisti túzetýler ázirleýdi tapsyramyn. Mindetti túrde máslihat otyrystarynyń onlain transliatsiiasyn engizý qajet. Halyq qalaýlylarynyń pikirtalasy, olardyń qoǵamdyq-saiasi beinesi qoǵamnan jasyryn bolmaýy tiis", - dedi Memleket basshysy.
Prezidenttiń aitýynsha, asa mańyzdy máseleniń biri – aimaqtardy biýdjetten qarjylandyrý modelin ázirleý.
"Bul rette ortalyq pen óńir arasyndaǵy qarym-qatynastan bólek, qarajattyń óńir ishinde bólinýine airyqsha nazar aýdarý kerek. Jergilikti biýdjetterdi bekitý barysynda baqylaýdy kúsheitý qajet. Sebebi bólingen qarjy kóp jaǵdaida turǵyndardyń shynaiy qajettiligine jumsala bermeidi. Bir-eki kósheni jyl saiyn qaita-qaita jóndei berý, imidjdik is-sharalarǵa jumsalatyn tiimsiz shyǵyndar azamattarymyzdyń narazylyǵyn týdyrýda. Bul oryndy", - dedi ol.
Toqaev infraqurylymdyq jáne áleýmettik bastamalarǵa aýdandar men eldi mekenderdiń biýdjetinen qarajat bólý úshin qoǵamdyq saraptama júrgizilýi tiis ekenin aitty. Bul úshin onlain saýalnamany da qoldanǵan jón.
