Prezident Qasym-Jomart Toqaev «Nur Otan» partiiasynyń Tóraǵasy bolyp sailandy, dep habarlaidy "Ult aqparat".
«Qazaqstan Respýblikasynyń Tuńǵysh Prezidenti – Elbasy Nursultan Nazarbaev Memleket basshysy Qasym-Jomart Toqaevty «Nur Otan» partiiasynyń Tóraǵasy etip sailaý týraly usynys engizdi.
Partiianyń kezekten tys XXI Seziniń sheshimimen Qazaqstan Respýblikasynyń Prezidenti Qasym-Jomart Kemeluly Toqaev biraýyzdan «Nur Otan» partiiasynyń Tóraǵasy bolyp sailandy», - delingen Prezident baspasóz qyzmetiniń Twitter-de jariialaǵan aqparatynda.
Eske salaiyq, qarashada ótken saiasi keńestiń keńeitilgen otyrysynda Nursultan Nazarbaev «Nur Otan» partiiasy tóraǵasynyń ókilettigin berý týraly sheshim qabyldaǵan bolatyn. Ol partiiany el Prezidenti basqarýy kerek ekenin aitqan edi. Keiinirek Elbasynyń baspasóz hatshysy Aidos Úkibai Tuńǵysh Prezidenttiń sheshimi bilik tranzitiniń zańdy jalǵasy ǵana ekenin aitty.
