Foto: Akorda.kz
Memleket basshysy Tótenshe jaǵdailar ministri Syrym Sháriphanovty qabyldady, - dep habarlaidy "Ult aqparat" Aqorda saityna silteme jasap.
Prezidentke Tótenshe jaǵdailar ministrliginiń atqaryp jatqan jumystary men jospary jóninde baiandaldy.
Memleket basshysyna ministrlikte aldaǵy ýaqytta júzege asyrylatyn transformatsiia jáne qoǵamda qaýipsizdik mádenietin qalyptastyrý jumystary týraly málimet berildi.
Ministrdiń aitýynsha, tótenshe jaǵdailardyń sany men aýqymy ulǵaiǵan jaǵdaida azamattyq qorǵaýdyń memlekettik júiesin tótenshe jaǵdaidyń saldaryn joiýdan buryn onyń aldyn alýǵa baǵdarlaý kózdelip otyr.
Sonymen qatar Prezidentke qutqarý bólimsheleriniń materialdyq-tehnikalyq bazasyn jaraqtandyrý jáne tsifrlandyrý isin nyǵaitý, sondai-aq qutqarýshylar men órt sóndirýshilerdiń kadrlyq áleýetin arttyrý, olardy áleýmettik qorǵaý sharalaryn kúsheitý jóninde aqparat berildi.
Syrym Sháriphanov halyqty aldyn ala qorǵaýǵa qajetti jaǵdai jasaý maqsatynda qoldanystaǵy normativtik-quqyqtyq aktilerge ózgerister men tolyqtyrýlar engizýge airyqsha mán berilip otyrǵanyn aitty.
Kezdesý sońynda Qasym-Jomart Toqaev ministrlikke tótenshe jaǵdailardyń sanyn azaitý, sondai-aq azamattardyń qaýipsizdigin qamtamasyz etýge baǵyttalǵan sharalar keshenin júzege asyrý jóninde tapsyrma berdi.
