Qasym-Jomart Toqaev Memlekettik tý kóterý rásimine qatysty, - dep habarlaidy "Ult aqparat" Aqordanyń resmi saityna silteme jasap.
Prezident jiynǵa qatysýshylardy Memlekettik rámizder kúnimen quttyqtap, bul kúnniń egemen elimiz úshin airyqsha mereili ári mańyzdy ekenin atap ótti. Onyń aitýynsha, qasterli Táýelsizdigimizdiń rámizderi qabyldanǵanyna dál búgin 30 jyl tolyp otyr.
"Qasietti nyshandarymyzda qazaqtyń myń jyldyq arman-tilegi, maqsat-muraty túgel toǵysqan. Tý halqymyz úshin qashanda erlik pen eldiktiń simvoly sanalǵan. Kók bairaǵymyz – myzǵymas memlekettiliktiń belgisi. Eltańbamyz – azattyqtyń aishyqty kórinisi. Al, Ánuranymyz – erkindik pen eldiktiń úni. Táýelsizdiktiń osy úsh simvoly halqymyzǵa erekshe rýh beredi. Árqaisymyzdyń keýdemizge maqtanysh uialatady. Óitkeni, bul – babalarymyzdyń oryndalǵan armany", – dedi Qasym-Jomart Toqaev.
Prezident elimizdiń basty qundylyqtaryn qurmetteý – bárimizdiń perzenttik paryzymyz ekenine nazar aýdaryp, oǵan nemquraily qaraityndarǵa, qadir-qasietin túsiretinderge birjola tosqaýyl qoiý qajettigin aitty.
– Memlekettik rámizderdi paidalaný tártibi jónindegi zańnamany kúsheitý mańyzdy. Sonymen birge, jastarmen jan-jaqty túsindirý jumysyn júrgizgen jón. Bul – búkil qoǵamnyń mindeti. Osy oraida, búgingi saltanatty is-sharanyń tárbielik máni óte zor. Tý kóterý – asa mańyzdy oqiǵalarǵa orai jasalatyn erekshe rásim. Halqymyz tarihi tańdaýyn jasaityn sátte alyp bairaǵymyzdyń kókte jelbireýin jaqsy yrymǵa balaimyz, – dedi Memleket basshysy.
Qasym-Jomart Toqaev saltanatty jiynda sóilegen sózinde memlekettik rámizder eldigimizdiń jarqyn kórinisi, halqymyzdyń maqtanyshy jáne abyroiy ekenin atap ótti. Onyń pikirinshe, Qazaqstannyń Týy, Eltańbasy men Ánurany ultymyzdyń azattyqqa, órkendeýge jáne jasampazdyqqa degen tabandy umtylysyn bildiredi. Sonymen qatar barshamyzdy myzǵymas birlikke uiystyryp, árbir azamatty Otan úshin kúndelikti qajyrly eńbek etýge jáne úlken jetistikterge úndeidi.
– Kók týymyzdy saltanatty túrde kóterip, ata-babamyzdyń dańqty dástúrin jalǵastyramyz. Jelbiregen týymyz Táýelsizdik murattaryna adal bolýǵa shaqyryp, erekshe jiger beredi. Jahandyq ekonomikada órship kele jatqan syn-qaterler men buryn-sońdy bolmaǵan geosaiasi shielenis jaǵdaiynda biz memlekettiligimizdi nyǵaitý úshin kúsh-qýatymyzdy eselei túsýimiz kerek. Memlekettik rámizderimizdi mazaq etýge, qorlaýǵa eshqashan jol bermeýimiz qajet. Mundai áreketterge barǵandardy qatań jazalaǵan jón. Birtutas halyq retinde uiysa otyryp, biz kez kelgen qiyndyqty birge jeńip, ádiletti, tiimdi memleket qura alamyz, – dedi Prezident.
Qasym-Jomart Toqaev sózin qorytyndylai kele, bas bairaǵymyzdy kótergen sátte eń úzdik kýrsanttarǵa áskeri shen tapsyrý igi dástúrge ainalǵanyn atap ótti.
– Sizder Qarýly Kúshterimizdiń 30 jyldyǵynda ofitser atanǵaly tursyzdar. Bul – úlken abyroi, zor jaýapkershilik. Sondyqtan osy mártebege laiyq bolyp, kópshilikke úlgi-ónege kórsetýlerińiz kerek. Týǵan eldiń tynyshtyǵy men tutastyǵyn qorǵaý – ár azamattyń qasietti boryshy. Táýelsizdik týyn biik ustaý – Otan kúzetinde turǵan árbir ulannyń abyroily mindeti. Erlik ister osyndai patriottyq sezimnen bastaý alady. Sizder el úmitin aqtaisyzdar dep senemin. Áskeri shenderińiz qutty bolsyn! Elimiz aman, jurtymyz tynysh bolsyn! Kók bairaǵymyz árdaiym biikte jelbiresin! – dedi Memleket basshysy.
Saltanatty rásim barysynda joǵary áskeri oqý ornynyń 12 úzdik túlegi Qazaqstan Prezidenti – Qazaqstan Respýblikasy Qarýly Kúshteriniń Joǵarǵy Bas qolbasshysynyń qolynan ofitser pogonyn aldy.
Tý kóterý rásimine Parlament Senatynyń tóraǵasy Máýlen Áshimbaev, Parlament Májilisiniń tóraǵasy Erlan Qoshanov, Premer-ministr Álihan Smaiylov, Memlekettik hatshy Erlan Qarin, Prezident Ákimshiliginiń Basshysy Murat Nurtileý, memlekettik organdar basshylary, Úkimet músheleri, Parlament depýtattary, Memlekettik rámizder men vedomstvolyq jáne olarǵa teńestirilgen ózge de nagradalar geraldikasy máseleleri jónindegi respýblikalyq komissiia músheleri, joǵary áskeri oqý oryndarynyń kýrsanttary men olardyń týystary qatysty.
