Memleket basshysy MKQ basshylyq quramyna jinalys ótkizip, Memlekettik kúzet qyzmetiniń jańadan taǵaiyndalǵan bastyǵy Ermek Saǵymbaevty tanystyrdy, dep habarlaidy "Ult aqparat" Aqordaǵa silteme jasap.
Prezident Memlekettik kúzet qyzmetiniń úlken jaýapkershiligi men mańyzdylyǵyna toqtalyp, barlyq qyzmetkerlerden, ásirese basshylyqtan erekshe bilim men biliktilik talap etiletinin aitty.
– Memlekettik kúzet qyzmetiniń mamandarynan kásibilik talap etiledi. Birinshiden, jaýyngerlik jáne fizikalyq daiyndyq. Bul rette Memlekettik kúzet qyzmetiniń, tiisti bólimshelerdiń basshylary jan-jaqty bilimdi, dúnietanymy keń, eldiń ishki saiasi jaǵdaiyn da, halyqaralyq ahýaldy da jaqsy meńgergen bolýy kerek. Olardyń halyqaralyq talaptardyń qyr-syryn jetik biletin zerek, taldaý jumystaryna qabiletti bolǵany jón. Biz tek osyndai jaǵdaida ǵana jumystan tiimdi nátije kútemiz, – dedi Qasym -Jomart Toqaev.
Prezident kadrlyq áleýetti arttyrý týraly aita kelip, MKQ ofitserleri memleketke, ózderine júktelgen qyzmetke adal jáne naǵyz patriottar bolýy kerek ekenin atap ótti. Memleket basshysy kadrlardy irikteýde dál osy ustanymdardy basshylyqqa alýdy basa aitty.
