«Memleket sharýaǵa qajet kómekti kórsetedi». Búgin Úkimettiń keńeitilgen otyrysynda Prezident Qasym-Jomart Toqaev osylai dedi, - dep habarlaidy «Ult aqparat».
Prezidenttiń aitýynsha, Mańǵystaý jáne Qyzylorda oblystarynda jaǵdai kúrdeli. Sondyqtan «memleket sharýaǵa qajet kómekti kórsetedi».
«Biyl qýańshylyq beleń alyp tur. Sharýalarǵa da ońai emes. Máselen, bir ǵana Mańǵystaýdyń ózinde jappai qyrylǵan maldyń sany 3 myńǵa jetti. Bir tonna shóptiń ortasha baǵasy 23 myń teńge, al keibir aimaqta 42 myń teńge boldy. Bul úshin jergilikti bilik qana emes, aýylsharýshalyǵy ministrligi de tikelei jaýapty. Óitkeni uiymdastyrý jumystary osy ministrliktiń quzyrynda», - dedi Prezident.
Osy oraida Memleket basshysy úkimet pen ákimderge qýańshylyq zardabyn shegip jatqan aimaqtarǵa jem-shóp jetkizip, maldyń qyrylýyn toqtatýdy, tótenshe shara retinde erekshe qorǵalatyn tabiǵi aýmaqtardan shóp jinaý múmkindigin qarastyrýdy tapsyrdy.
Ulttyq qoǵamdyq senim keńesiniń múshesi bolǵan Jánibek Qojyq ózi týyp-ósken ólkeniń qýańshylyqtaǵy jaǵdaiy týraly áńgimelep berdi. Onyń aitýynsha, ár kóshedegi 15-16 úi birigip shyǵaratyn 300-den astam ýaq mal aýyldan 5-6 shaqyrymnan alysqa uzai almaidy.
«Óriske shyqty degen aty bolmasa ýaq mal jeitin shóp tappai, qý tastan ózge túk joq jerdi iiskelep júr. Qaraiǵan buta kórinse, sony kemirip tura qalady. Túste kún qainaǵanda aýylǵa aidaimyz. Mańyrap, shýlap qaitady. Qorada da jei qoiatyn jem-shóp joq. Tabylsa kebek, sýǵa jibitip karton qaǵaz beremiz. Aýyl aqsaqaldary biylǵydai qýańshylyqty ómiri kórmedik dep otyr. Qaita bizdiń aýyldyń ainalasyna biyl azdap qar jaýǵan edi. Sonyń kúshimen shyqqan kókti osyǵan deiin talǵajaý etip keldik. Sondyqtan bizdiń jaǵdaiymyz Mańǵystaý óńirindegi basqa aýyldardan góri sál táýir deýge bolar. Tushyqudyq, Aqshyńyraý, Qyzan aýyldary, Beineý aýdany túgel qatty qinalyp otyr», – deidi qoǵam belsendisi Jánibek Qojyq.
Al Qyzylorda oblysy Aral aýdanynyń Qamystybas aýylynyń sharýasy Raqymjan Kóptileýovtiń sózinshe, keiingi kezde óristen qaitpai qalatyn mal kóbeigen.
«Aýyldan uzap shyqqan kóterem siyr qaitarda 4-5 ret toqtap, demalyp keledi. Sýy tartyla bastaǵan kóldiń jaǵasyndaǵy qorys shóbine entelei kirgen jylqy qaita shyǵa almai batpaqta qalyp jatyr. Qazir aýyl adamdary kól mańyn baqylap, kóterem jylqyny kólden súirep shyǵaryp júr. Jaiylymǵa ketken túie toimasa botasyna da oralmaidy. Shóp taba almaǵan túie jyńǵyl jeidi. Kishi Araldyń arǵy betinde myńdap jylqy aidaityn kásipkerler bieni emip álsiretpesin dep biyl erte kóktemde qulyndaryn 20-40 myń teńgeden jappai arzanǵa satyp qutyldy. Oǵan kúlgender qazir sata almai da júr», – deidi Aral aýdanynyń sharýasy Raqymjan Kóptileýov.
Mal sharýashylyǵy mamandarynyń sózinshe, búginde Shyǵys Qazaqstan, Pavlodar oblystary men Batys Qazaqstan oblysynyń soltústiginde ǵana qýańshylyq báseń. Qalǵan óńirdiń barlyǵynda qýańshylyq baiqalyp tur.
Qyzylorda oblysy aýyl sharýashylyǵy basqarmasynyń mal sharýashylyǵyn damytý bóliminiń basshysy Arystan Omarovtyń aitýynsha, Aral aýdanynda jármeńke uiymdastyrylyp, tirkemesi bar 32 kólik shóp, eki kólik jem jetkizilip, arzan baǵamen taratylǵan. Sonyń arqasynda jaǵdai birshama turaqtalǵan.
Esterińizge sala keteiik, búgin Úkimettiń keńeitilgen otyrysynda Prezident Qasym-Jomart Toqaev «memleket sharýaǵa qajet kómekti kórsetedi» dedi. Prezidenttiń aitýynsha, Mańǵystaý jáne Qyzylorda oblystarynda jaǵdai kúrdeli. Osy oraida Memleket basshysy úkimet pen ákimderge qýańshylyq zardabyn shegip jatqan aimaqtarǵa jem-shóp jetkizip, maldyń qyrylýyn toqtatýdy, tótenshe shara retinde erekshe qorǵalatyn tabiǵi aýmaqtardan shóp jinaý múmkindigin qarastyrýdy tapsyrdy.
