Foto: Aqordanyń bapasóz qyzmeti
Prezident Qasym-Jomart Toqaev Mańǵystaý oblysy Munaily aýdany turǵynynyń tushy sý tapshylyǵyna qatysty aryz-shaǵymyna nazar aýdardy, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Úkimet pen oblys ákimdigine atalǵan máseleni múmkindiginshe qysqa merzimde sheshýdi tapsyrdy.
Úkimettiń málimeti boiynsha búginde óńirdegi sý tapshylyǵy – eń ózekti máselelerdiń biri. Sýdyń jetispeýshiligi táýligine 77 200 tekshe metrdi quraidy. Aýyzsýdyń tapshylyǵy, ásirese, jaz mezgilinde qatty seziledi.
Munaily aýdanynda kúrdeli jaǵdai qalyptasyp otyr. Qazirgi ýaqytta "Kaspii" sý tushytý zaýytyndaǵy isten shyqqan sorǵy qondyrǵysynyń jóndelip jatqanyna bailanysty aýdandaǵy sý berý mólsheri táýligine 13 myń tekshe metrden 10 myń tekshe metrge deiin azaiǵan.
Aýdan turǵyndary arasynda túsindirý jumystary júrgizilip jatyr.
Máseleni kezeń-kezeńimen sheshý úshin óńirde sý tushytý zaýyttary men qondyrǵylardyń qurylysy júrgizilýde.
Halyq sanynyń jyl saiyn ósýine bailanysty "Kaspii" sý tushytý zaýytynyń qýatyn táýligine 20 myń tekshe metrge arttyrý qajet. Bul aýyzsý berý mólsherin táýligine 40 myń tekshe metrge deiin jetkizýge múmkindik beredi.
Osy maqsatta Úkimet rezervinen 5,6 milliard teńge bólý jóninde sheshim qabyldandy.
Munaily aýdanyn sýmen "Mańǵystaý jylý" MKK qamtamasyz etedi. Aýyzsý tapshylyǵyna bailanysty "Mańǵystaý jylý" MKK halyqqa sýdy qubyr arqyly keste boiynsha jetkizedi. Sonymen qatar, sýdy aýdan turǵyndarynyń suranysy boiynsha sý tasityn kólikpen ákeledi.
"Kaspii" sý tushytý zaýytynyń qýatyn táýligine 40 myń tekshe metrge deiin jetkizý jónindegi jobanyń júzege asyrylýy Munaily aýdanynyń aýyldary men Qaraqiia aýdany Quryq aýylynyń turǵyndaryn sýmen úzdiksiz qamtamasyz etýge jáne sý tapshylyǵyn tolyq joiýǵa múmkindik beredi.
