Memleket basshysy Qasym-Jomart Toqaev QR Premer-Ministri Asqar Mamindi qabyldady, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev Úkimet basshysynyń biylǵy qańtar-tamyz ailary aralyǵyndaǵy elimizdiń áleýmettik-ekonomikalyq damý qorytyndylary týraly esebin tyńdady.
Premer-Ministr segiz aida qaita óńdeý ónerkásibindegi ósim 3,3%-ǵa, onyń ishinde mashina jasaý – 16,3%-ǵa, kólik qurastyrý – 51,8%-ǵa, sondai-aq farmatsevtika –34,1%-ǵa, jeńil ónerkásip – 11%-ǵa, himiia ónerkásibi – 3,1%-ǵa jáne daiyn metal ónimderin shyǵarý – 18,8%-ǵa óskenin málimdedi.
2020 jyly Indýstriialandyrý kartasy aiasynda, jalpy somasy 996 mlrd teńge bolatyn 206 jobany iske qosý josparlanǵan. Bul óndiris kólemin 1,3 trln teńgege, eksportty 325 mlrd teńgege arttyrýǵa jáne 19 myńǵa jýyq jańa jumys oryndaryn ashýǵa múmkindik beredi.
Qurylys kólemi – 6,5%-ǵa, turǵyn úidi paidalanýǵa berý – 6,4%-ǵa nemese 8,1 mln sharshy metrge artty. Jyl basynan beri 71 myń jańa úi salyndy, bul ótken jylmen salystyrǵanda 8,6%-ǵa artyq.
Aýyl sharýashylyǵyndaǵy turaqty ósim 4,9% qurady, azyq-túlik óndirisiniń kólemi 3,6%-ǵa artty.
Asqar Maminniń aitýynsha, qabyldanǵan sharalar nátijesinde áleýmettik mańyzdy taýarlar baǵasynynyń artýyn 4,4% deńgeiinde ustap turýǵa múmkindik berdi, bul ótken jyldyń kórsetkishterimen salystyrǵanda eki ese (8,7%) tómen.
Jyl basynan beri memlekettik baǵdarlamalar aiasynda 874 myń adam jumyspen qamtylǵan, ótken jylmen salystyrǵanda bul kórsetkish 82,1%-dan asady.
Memleket basshysy kezdesý qorytyndysy boiynsha turǵyndardy jumyspen qamtý, kásipkerlik sýbektilerine qoldaý kórsetý, óndiris úderisterine jańa tehnologiialar engizý, epidemiologiialyq jaǵdaidy turaqtandyrý men karantin talaptaryn birtindep jeńildetý mańyzdy ekenin atap ótti.
