Memleket basshysy Qasym-Jomart Toqaev Maqtaaral aýdanynda zardap shekken aýyldardyń árbir azamaty qamqorlyqsyz qalmaitynyna sendirip, sondaǵy halyqqa kómek qolyn sozǵan azamattardyń bárine rizashylyǵyn bildirdi, dep habarlaidy "Ult aqparat".
«1 mamyr kúni Ózbekstan Respýblikasyndaǵy Sardoba sý qoimasy bógetiniń buzylýy saldarynan Túrkistan oblysynda sý tasqyny boldy. Bul – tehnogendi sipattaǵy tótenshe jaǵdai. Maqtaaral aýdanyna qarasty 5 aýyldyń 1 myńnan astam turǵyn úiin sý basyp qaldy. Sondai-aq 9 eldi mekendi sý basý qaýpi týyndady. Shuǵyl qabyldanǵan sharalardyń arqasynda sý tasqynynyń ári qarai taralýyna jol bermedik. Qazir sý tasqynynyń zardaptaryn joiý, tazalaý jumystary júrgizilýde. Qoǵamdyq tártip pen turǵyndardyń dúnie-múlkiniń saqtalýyn qamtamasyz etý basty nazarda. Biz aýdannyń kúndelikti tirshiligin qaita qalpyna keltirý úshin qajetti sharalar qabyldaimyz», - dedi Prezident Tótenshe jaǵdai rejimin qamtamasyz etý boiynsha memlekettik komissiia otyrysynda.
Memleket basshysy jalpy kúzge deiin qiraǵan úilerdiń ornyna jańa turǵyn úiler salynatynyn jetkizdi.
«Zardap shekken árbir adamǵa 100 myń teńge kóleminde ótemaqy tólenedi. Mal shyǵyny, tasqynnyń aýyl sharýashylyǵy alqaptaryna tigizgen ziiany óteledi. Jalpy, zardap shekken aýyldardyń árbir azamaty qamqorlyqsyz qalmaidy. Olarǵa járdem beremiz. Zardap shekken aýdanǵa kómektesip jatqan azamattardyń bárine rizashylyǵymdy bildiremin. Tasqyn bolǵan jerde ákimdik, sondai-aq, Qorǵanys ministrligi, Ulttyq ulan men Tótenshe jaǵdai jónindegi komitet bólimsheleri jáne politsiia qyzmetkerleri jumys isteýde. Otandyq jáne sheteldik iri biznes ókilderi de zardap shekken turǵyndarǵa aitarlyqtai kómek bergenin erekshe atap ótken jón. Mundai azamattardy halqymyzdyń shynaiy patriottary, tileýlesteri deýge bolady. Barshańyzǵa alǵys aitamyn! Qazaqstandyqtar bul joly da bir jeńnen qol, bir jaǵadan bas shyǵara bildi. Biz birge bolsaq, barlyq qiyndyqqa tózemiz. Kez kelgen mindetti oryndaýǵa múmkindigimiz jetedi», - dedi Qasym-Jomart Toqaev.
Prezident Qazaqstan qazir kúrdeli kezeńdi bastan ótkerip jatqanyn aityp ótti.
«Halqymyzdyń bekem birligi bárimizge kúsh-qýat beredi. Jumyla kótergen júk jeńil. Biz buǵan deiin talai synaqtan súrinbei óttik. Bul qiyndyqty da eńseremiz dep senemin», - dep túidi Memleket basshysy.
