Bul týraly Memleket basshysy Qasym-Jomart Toqaev «QAZAQSTAN» ulttyq telearnasyna bergen suhbatynda aitty, dep jazady Baq.kz portaly.
Prezident suhbatta Qazaqstannyń Reseimen qarym-qatynasy qandai bolýy kerek degen suraqqa toqtaldy.
"Qazaqstan men Resei arasynda máńgi tatý kórshilik týraly kelisim bar. Resei – ǵasyrlar boiy qatar ómir súrip kele jatqan qudaiy kórshimizdiń biri. Qazaqtyń taǵdyryna osylai jazylǵan. Muny biz ózgerte almaimyz. Saiasi, saýda-ekonomikalyq jáne mádeni bailanystardy nyǵaita berýimiz kerek. Bul, eń aldymen, Qazaqstannyń strategiialyq múddesine sai keledi. Ekinshi másele. Iá, rasynda da, keibir reseilik saiasatkerler tarapynan «Qazaqstannyń soltústik oblystaryndaǵy jerler bizdiki» degen sózder aityldy. Birden kesip aitaiyn. Bul – aqylǵa syimaityn, orynsyz pikir. Resmi bilik, iaǵni Kreml, árine, bul ýájdi qoldamaidy", - dep atap ótti Memleket basshysy.
Sonymen qatar Prezident jer máselesine qatysty eki eldiń biligi arasynda eshqashan daý týyndaǵan joq dep otyr.
"Eki eldiń basshylyǵy arasynda jer máselesine qatysty eshqashan daý týyndaǵan emes. Maǵan V. Pýtinniń ózi «jerge qatysty eshqashan másele kótermeimiz» dep aitqan. Sondyqtan alańdaityn eshnárse joq. Shekaramyz tolyq aiqyndalǵan, bekitilgen. Bul aqiqatty búkil álem moiyndaidy. Eki eldiń arasyndaǵy bailanystarǵa syzat túspegen. Resei Prezidenti osyndai qaǵidattarǵa adaldyǵyn, beriktigin kórsetti", - dedi Qasym-Jomart Toqaev.
