Qazaqstan Prezidenti Qasym-Jomart Toqaev Qytaiǵa memlekettik sapary barysynda osy el túrmesinde jatqan otandasymyz Aqjarqyn Turlybaidyń máselesin kóterdi. Bul týraly búgin Ortalyq kommýnikatsiialar qyzmetindegi brifingte QR Prezidentiniń kómekshisi Murat Nurtileýov málimdedi, dep habarlaidy "Ult aqparat".
«Biz jol júrgeli otyrǵanda Qasym-Jomart Kemelulynyń atyna 2014 jyly Gýanchjoý áýejaiynda Qytai quqyqqorǵaý organdary ustaǵan otandasymyz Aqjarqyn Turlybaidyń anasynan ótinish túsken bolatyn. Onyń mátini BAQ-ta jariialandy. Osyǵan orai Memleket basshysy Beijińdegi kezdesýlerde qytai tarapyna jeke óziniń ótinishin jetkizdi. Bul másele jan-jaqty talqylandy», - dedi Murat Nurtileýov.
Onyń atap ótýinshe, ótinish nátijesi boiynsha Syrtqy ister ministrligi arqyly osy jumysty jalǵastyrý ýaǵdalastyǵyna qol jetkizildi.
«Memleket basshysy óz tarapynan bul máselege úlken kóńil bólip otyr. Sondyqtan sapar nátijesi boiynsha beriletin tapsyrmalar tizimine otandasymyzdyń taǵdyryna qatysty másele arnaiy tarmaq retinde engiziledi», - dedi Prezident kómekshisi.
Eske sala keteiik, Qazaqstan azamaty Aqjarqyn Turlybai 2014 jyly naýryzda Gýanchjoý áýejaiynda ustalǵan bolatyn. Oǵan shekaradan 4,5 keli esirtkini alyp ótpek boldy degen aiyp taǵyldy. Ol kezde otandasymyz 20 jasta bolǵan edi. 2015 jyldyń maýsymynda Qytai soty ony ómir boiyna bas bostandyǵynan aiyrdy. Sotta Aqjarqyn sheteldik dosy aldap ketkenin aityp, kinásin moiyndaǵan joq.
2016 jyly sot sheshimi joiylyp, is qaita qaraýǵa jiberildi.
Biyl 3 qyrkúiekte Qytaidyń Gýanchjoý qalalyq sotynda Aqjarqyn Turlybaidyń isi boiynsha otyrys ótti. Otyrysta qorǵaýshy tarap usynǵan qylmystyq is materialdary qaraldy. Úkimniń qashan jariialanatyny belgisiz.
Al 9 qyrkúiekte otandasymyzdyń anasy Zýhra Seitimova Qazaqstan prezidentine kómek surap hat jazǵany habarlandy.
