Prezident Qasym-Jomart Toqaev Ulttyq quryltaida sóilegen sózinde burynǵy mádeniet jáne sport ministri Arystanbek Muhamediulyn túirep ótti, dep habarlaidy "Ult aqparat".
«Álemde eńbekti básekelestik deńgeiine kótergen memleketter bar. Sonyń arqasynda olar sapaly ónimderimen jer júzin moiyndatyp otyr. Bul halyqtar óz urpaǵyn jas kezinen tynbai jumys isteýge baýlidy. Solardyń tájiribesin ózimizge beiimdep, bala tárbiesine engizý jaiyn qarastyrǵan jón.
Halqymyz «Eńbek – yrystyń bulaǵy, baqyttyń shyraǵy» dep beker aitpaǵan. Jańa Qazaqstanda eńbekqor adam eń syily adam bolýǵa tiis. Biz óskeleń urpaqty adal eńbekke baýlyp, jahandyq naryqta básekege qabiletti etip tárbieleýimiz qajet. Mańdai termen tapqan ár tiyn – naǵyz ardyń isi, Abai aitqan «tolyq adamnyń» eńbegi ekenin jastardyń sanasyna toqýymyz qajet.
Bizdiń burynǵy bir ministrimiz baýyrlas kórshi memlekettiń azamattaryn keleke qylǵany bar. Olar Reseige baryp, qara jumys isteýge májbúr, al biz, qazaqtar, ondai jumysty istemeimiz, baqytty halyqpyz dep aitqan.
«Estimegen elde kóp», árine. Biraq, budan ótken soraqylyqty oilap tabýdyń ózi qiyn. Eńbekten qashqan adam keýdesin uryp, maqtanbai, kerisinshe, ondai áreketinen uialýy kerek. Eńbek degenimiz – bul qasietti uǵym. Adal eńbekti kúlki etip, mazaq qylýǵa bolmaidy. Mundai teris pikirler jastardy adastyrady, olardyń dúnietanymyna jaǵymsyz áser etedi. Tipti, keide jastarymyz jumystan qashyp, jeńil tabys kózin izdep jatady. Aqyr sońynda, munyń bári búkil halyqtyń abyroi-bedeline nuqsan keltiredi» - dedi Memleket basshysy jiynda sóilegen sózinde.
Aita keteiik, 2016 jyly mamyrda sol kezdegi mádeniet ministri Arystanbek Muhamediuly "Máskeýde qoǵamdyq dárethanalardy tazalap júrgen qyrǵyz qyzdaryn aiaitynyn" aitqan edi.
"Jastyq shaǵynda nelikten olar dárethana jýyp júr? Árine, óz elinde jumys, perspektiva bolmaǵandyqtan, kóptegen qyrǵyz basqa jaqqa ketýge májbúr boldy", -degen edi burynǵy ministr Arystanbek Muhamediuly.
Osydan keiin Qyrǵyzstannyń syrtqy ister ministrligi Bishkektegi Qazaqstan elshiligine qarsylyq notasyn joldady. Áleýmettik jelide qazaqstandyqtar men qyrǵyzstandyqtar Muhamediulyn osyndai pikiri úshin synap tastady. Artynsha Arystanbek Muhamediuly qyrǵyzdardan keshirim surady.
