Memleket basshysy Qasym-Jomart Toqaev Joǵary eýraziialyq ekonomikalyq keńestiń (JEEK) kezekti otyrysyna beinebailanys rejiminde qatysty, - dep habarlaidy "Ult aqparat" Aqorda saityna silteme jasap.
Sammitke Qazaqstan Prezidentinen basqa Qyrǵyz Respýblikasynyń prezidenti - JEEK tóraǵasy Sadyr Japarov, Armeniianyń premer-ministri Nikol Pashinian, Belarýs prezidenti Aleksandr Lýkashenko, Resei prezidenti Vladimir Pýtin, Eýraziialyq ekonomikalyq odaq janyndaǵy baqylaýshy memleketterdiń basshylary: Kýba prezidenti Migel Dias-Kanel jáne Ózbekstan prezidenti Shavkat Mirziioev, sondai-aq Eýraziialyq ekonomikalyq komissiia alqasynyń tóraǵasy Mihail Miasnikovich qatysty.
Qazaqstan Prezidenti óz sózinde Eýraziialyq ekonomikalyq odaqqa múshe memleketterdiń jahandyq jáne aimaqtyq syn-qaterler jaǵdaiynda ózara kúsh biriktire otyryp, áleýmettik-ekonomikalyq kedergilerdi sátti eńseretinin, makroekonomikalyq turaqtylyq pen ósim qarqynyn qamtamasyz etetinin atap ótti.
"Odaqtyń jumysy bastalǵan ýaqyttan beri Qazaqstannyń ózara saýda-sattyq kórsetkishi 33 paiyzǵa, al eksporty 55 paiyzǵa artty. Qazaqstanda 15 myńnan astam birlesken kásiporyn jumys isteidi. Olardyń sany artyp keledi. Bul qýanarlyq jait. Atalǵan kórsetkishter bizdiń integratsiialyq yqpaldastyǵymyzdyń tabystylyǵyn kórsetedi. Ortaq kúsh-jigerimizdiń aldaǵy ýaqytta da azamattarymyzdyń igiligi jolyndaǵy saýda-ekonomikalyq yntymaqtastyqtyń qarqynyn damytýǵa baǵyttalǵany mańyzdy dep sanaimyn. Muny jahandyq syn-qaterler aldyndaǵy bizdiń "ujymdyq immýnitetimizdi" nyǵaitýdyń kepili dep bilemin", - dedi Qasym-Jomart Toqaev.
Prezidenttiń pikirinshe, búginde baiqalyp otyrǵan sanktsiialyq qaishylyqtar shyn máninde buryn-sońdy bolmaǵan.
"Biylǵy aqpan aiynda elordada ótken Eýraziialyq úkimetaralyq keńes aiasynda "eýraziialyq bestikke" kiretin elder ekonomikasynyń ornyqtylyǵyn qamtamasyz etý úshin Joǵary deńgeidegi Jumys tobyn qurýdy usyndym. Jumys toby quryldy. Jedel sharalar toptamasy ázirlenip, júzege asyrylyp jatyr. Naqty nátijeler de bar. Biraq kúrdeli geosaiasi ahýaldyń áli de jalǵasatynyn este ustaý qajet. Buǵan daiyn bolýymyz kerek", - dedi Memleket basshysy.
Qasym-Jomart Toqaev keńes qatysýshylaryna qazirgi jaǵdailar men integratsiialyq birigý úderisine sai keletin Qazaqstannyń eki mańyzdy bastamasyn qarastyrýdy usyndy.
"Mańyzdy jobalar men naqty nátijeler kerek. Bul úshin Eýraziialyq ekonomikalyq odaqqa múshe memleketterdiń birlesken jobalaryn tezirek aiaqtaý qajet, sondai-aq jańa investitsiialyq jobalar usyný kerek. Aimaqtyq jáne jahandyq básekege qabilettilikti qamtamasyz ete otyryp, biznes salasyndaǵy yqpaldastyqty kúsheitý, transqurlyqtyq dálizderimizdiń jyldamdyǵyn jetildirý qajet. Sanktsiialardy eskere otyryp, sheteldik kompaniialardyń basqa jerge kóshýi úshin qolaily jaǵdai jasaý máselesine airyqsha nazar aýdarýdy usynamyn. Álemdik alpaýyt elder de Eýraziialyq ekonomikalyq odaqqa múshe memleketterdiń geoekonomikalyq ornalasý jaǵynan basymdyqqa ie ekenin jaqsy biledi. Sondyqtan 180 million tutynýshysy bar naryǵymyzdyń áleýetin elemeý múmkin emes. Atalǵan sharalardy 12 aidyń ishinde júzege asyrýdy usynamyn", - dedi Qazaqstan Prezidenti.
Memleket basshysy bul jumystardy Joǵary deńgeidegi Jumys toby aiasynda Eýraziialyq ekonomikalyq komissiia alqasynyń salalyq múshe - ministriniń tóraǵalyǵymen atqarýǵa bolady dep sanaidy. Jumys tobynyń aralyq baiandamasyn osy jyldyń jeltoqsan aiynda qarastyrý usynyldy.
"Qazirgidei kúrdeli kezeńde úshinshi eldermen, integratsiialyq birlestiktermen ekonomikalyq yntymaqtastyqty keńeitý jáne tereńdetý máselesi ózekti bolyp otyr. Bul jóninde byltyr qazan aiynda ótken Joǵary keńestiń otyrysynda aittym. Qazaqstan Eýraziialyq ekonomikalyq odaq organdaryna tóraǵalyq etken kezde osy baǵyt basymdyq retinde aiqyndaldy. Ótken jyldyń sońynda Shanhai yntymaqtastyq uiymymen ózara túsinistik týraly memorandýmǵa qol qoiyldy. Tez arada jumysty qolǵa alyp, naqty jobalar men bastamalardy talqylaýdy bastaý kerek. Búgin biz Indoneziiamen erkin saýda týraly kelisimge kelý jóninde kelissózdi bastaimyz. Úndistanmen kelissóz júrgizilip jatyr, Mońǵoliiamen kelisim pysyqtalý satysynda", - dedi Qasym-Jomart Toqaev.
Prezidenttiń aitýynsha, qazirgi jaǵdaida atalǵan baǵyttyń ózektiligi arta túspek. Memleket basshysy Komissiia men Úkimetterdi atalǵan jumysty jedeldetýge shaqyrdy.
"Keshe birinshi Eýraziialyq ekonomikalyq forým ótti. Onda ózekti máseleler men olardy sheshý joldary talqylandy. Eýraziialyq integratsiiany odan ári damytý jóninde pikir almastyq. Tabysty bolǵan osy eki kúnde qol jetkizilgen ýaǵdalastyqtar men sheshimder bizdiń birigý úderisimizdi odan ary damytý aiasynda jalǵasyn tabatynyna senimdimin", - dep Memleket basshysy sózin túiindedi.
