Foto: Akorda.kz
Prezident «Qazaqstan temir joly» UK» AQ basqarma tóraǵasy Nurlan Saýranbaevty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna ulttyq kompaniianyń byltyr atqarǵan jumystarynyń negizgi nátijesi, temirjol salasyn damytýdyń aldaǵy kezeńge arnalǵan jospary, sondai-aq berilgen tapsyrmalardyń oryndalý barysy jóninde málimet berildi.
Nurlan Saýranbaevtyń aitýynsha, "Qazaqstan temir joly" UQ" aktsionerlik qoǵamynyń júk tasý ainalymy 252 milliard tonna-shaqyrymǵa deiin artty. Bul – elimizdiń táýelsizdik jyldaryndaǵy eń joǵary kórsetkishi. JPE-men (jiyrma puttyq ekvivalentpen) eseptegende, jalpy konteinermen tasymaldaý kólemi 1,129 myńǵa deiin ósti.
Sonymen qatar, Qasym-Jomart Toqaevqa infraqurylymdyq jobalardyń iske asyrylýy jóninde baiandaldy. Úsh jylda barlyǵy 1285 shaqyrym jol salý josparlanyp otyr. Bul júk tasymalynyń kólemin ulǵaityp, elimizdiń eksporttyq áleýetin arttyrýǵa múmkindik beredi. Temirjol qurylysynda paidalanylatyn qazaqstandyq ónimder men qyzmetterdiń úlesi – 85 paiyz.
Budan bólek, "Qazaqstan temir joly" basshysy Prezidentke halyqaralyq kólik dálizderin damytý jáne Aqtaý, Quryq teńiz porttarynyń ótkizý qabiletin keńeitý jumystarynyń barysy, sondai-aq sheteldik iri kólik-logistikalyq kompaniialarmen yntymaqtastyq máseleleri jóninde aitty.
Kezdesý sońynda Memleket basshysy temirjol infraqurylymyn damytýǵa jáne jańǵyrtýǵa qatysty birqatar naqty tapsyrma berdi.
