Foto: Aqordanyń baspasóz qyzmeti
Memleket basshysy Qostanai oblysynyń ákimi Qumar Aqsaqalovty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Prezidentke Qostanai oblysynyń byltyrǵy áleýmettik-ekonomikalyq damýy týraly esep berildi.
Oblys ákimi 2023 jyldyń qorytyndysy boiynsha óńirdiń negizgi makroekonomikalyq ósim kórsetkishterinde oń dinamika baiqalatynyn baiandady. Atap aitqanda, óńdeý ónerkásibi 11 paiyz, qurylys salasy 7 paiyz, negizgi kapitalǵa salynǵan investitsiia 8,5 paiyz, kólik tasymaly 3 paiyz, turǵyn úidi paidalanýǵa berý kólemi 5 paiyz ósken.
Qumar Aqsaqalovtyń málimetinshe, jalpy óńirlik ónimdegi ónerkásip salasynyń úlesi 30 paiyzdan asty. Ásirese, jergilikti mashina jasaý kásipornynda shyǵarylatyn avtokólik modelderiniń qatary kóbeiip keledi. «SaryarqaAvtoÓnerkásip» JShS jylyna 30 myń Chevrolet Onix avtokóligin qurastyrý úshin quny 23 milliard teńge bolatyn investitsiialyq jobany júzege asyra bastady. Nátijesinde 400 jańa jumys orny ashylmaq. Sondai-aq KIA mashina jasaý zaýytynyń qurylysy bastaldy. Koreialyq avtokontsernmen birlesken bul jobaǵa 90 milliard teńge kóleminde investitsiia tartylǵan. Atalǵan joba aiasynda jylyna 70 myń kólik shyǵarylady jáne 1,5 myń jańa jumys orny ashylady dep josparlanyp otyr. Buǵan qosa, avtokóliktiń qosalqy bólshekterin óndiretin lokalizatsiialyq ortalyq salý kózdelgen. Joba quny – 13 milliard teńge.
Sonymen qatar Prezidentke Qostanai óńirin sýmen qamtý, áleýmettik nysandar salý barysy jóninde málimet berildi. Oblys ákiminiń aitýynsha, ótken jyly eldi mekenderdi sýmen qamtamasyz etý úshin jalpy quny 21 milliard teńge bolatyn 69 joba qolǵa alynǵan. Búginde 37 joba tolyqtai júzege asyryldy. Nátijesinde aimaq turǵyndaryn sýmen qamtý kórsetkishi 86,6 paiyzǵa deiin jetken jáne qazirgi ýaqytta 347 aýyl taza aýyzsý tutynyp otyr.
Búginde oblysta jalpy syiymdylyǵy 1 980 oqýshyǵa arnalǵan úsh mekteptiń qurylysy júrgizilip jatyr. Oblys ortalyǵynda «IQostanay» oqýshylar saraiy ashyldy. Ortalyqta 1300 balanyń jan-jaqty damýyna jaǵdai jasalǵan. Buǵan qosa, 2025 jylǵa deiin 7500 oryndyq 9 zamanaýi mektep salý josparlanǵan. Onyń ishinde 8 bilim ordasy «Jaily mektep» jobasy aiasynda paidalanýǵa beriledi.
Qumar Aqsaqalov Memleket basshysynyń tapsyrmasyna sáikes qazirgi kezde Aqtóbe oblysynan Qostanai qalasyna deiin magistraldy gaz qubyryn tartý úshin tehnikalyq-ekonomikalyq negizdeme ázirlenip jatqanyn jetkizdi. Bul joba Qostanai óńiriniń eldi mekenderin kógildir otynmen qamtamasyz etip qana qoimai, iri investitsiialyq jobalardyń iske asyrylýyna qolaily jaǵdai jasaidy. Gazben qamtamasyz etý kólemin ulǵaitý birneshe jobany júzege asyrýǵa, sonyń ishinde ystyq kúiinde brikettelgen temir shyǵaratyn jáne bolat balqytatyn zaýyttar salýǵa múmkindik beredi. Óz kezeginde bul óńirdiń ekonomikasyn jandandyryp, jańa jumys oryndary ashylady.
Kezdesý sońynda Memleket basshysy Qasym-Jomart Toqaev oblys ákimine jylytý maýsymyn qalypty rejimde ótkizý, óńirdi gazben qamtamasyz etý jobasyn ýaqytyly júzege asyrý máselelerin Úkimetpen birge airyqsha baqylaýǵa alýdy, sondai-aq kóktemgi egis naýqanyna ázirlikti pysyqtaýdy tapsyrdy.
