Memleket basshysy Qasym-Jomart Toqaev Qorǵanys ministri Nurlan Ermekbaevqa qatań sógis jariialady, dep habarlaidy "Ult aqparat".
«Barlyq kináli azamattar jaýapqa tartylýy qajet. Arsenalǵa jaqyn jer bergen memlekettik qyzmetkerler de jaýapqa tartylýy shart.
Tiisti jumystar júrgizilip jatqany kórinip tur. Alaida biz qazir júielik kemshilikterdiń, sondai-aq áskeri vedomstvo tarapynan baqylaýdyń álsireýiniń saldarymen kúresip jatyrmyz. Qorǵanys ministrligi júiesine kelgenińizge kóp bolǵan joq, alaida saladaǵy jaǵdaiǵa tolyq jaýaptysyz. Joǵarǵy Bas qolbasshy retinde Qorǵanys ministrliginde týyndaǵan jaǵdaiǵa qanaǵattanbaimyn. Sondyqtan sizge qatań sógis jariialaimyn», - dedi Toqaev Úkimettiń keńeitilgen otyrysynda.
Memleket basshysynyń qatań sógis jariialaǵanyn estigen qorǵanys ministri Nurlan Ermekbaev birden «Est!» dep ornynan turdy.
Osy oraida Prezident Arystaǵy jarylystyń saldary óte aýyr ekenin atap ótti.
«Biz kúsh-jigerdi osy saldardy joiýǵa jumyldyrdyq. Qalanyń basym bóligi qirady», - dedi Q.Toqaev.
Eske sala ketsek, Arys qalasyndaǵy áskeri bólimniń qoimasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskeri qyzmetshi. 170-ke jýyq adam zardap shekti. 20-ǵa jýyq úi, 9 qora-qopsy janyp, dalaly aýmaqta 14 oshaq tutandy. Úi-jailar men ǵimarattardyń 80-90 paiyzyna ártúrli deńgeide zaqym keldi. Birqatar óńirde shuǵyl jeliler quryldy.
Túrkistan oblysyna arnaiy barǵan Qazaqstan Prezidenti Qasym-Jomart Toqaev Arystaǵy áskeri bólimshedegi oq-dári qoimasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.
Úkimet otyrysynda Premer-Ministr Asqar Mamin jarylys saldarynan kóz jumǵandardyń týǵan-týystaryna kóńil aityp, turǵyndarǵa barlyq kómek kórsetiletinin aitty. Keltirilgen zalaldyń kólemi baǵalanyp, Úkimet rezervinen aqsha bólinedi.
Evakýatsiialaý kezinde myńnan astam ata-ana balarynan kóz jazyp qaldy. Sábilerdiń barlyǵy týys-týǵandaryna din-aman tapsyryldy.
Jarylys bolǵannan keiin tórtinshi kúni turǵyndar Arys qalasyna qaitty.
