Foto: Akorda.kz
Memleket basshysy Qasym-Jomart Toqaev qorǵanys ministri Rýslan Jaqsylyqovty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Prezidentke - Qarýly Kúshterdiń Joǵarǵy Bas qolbasshysyna Qorǵanys ministrliginiń byltyr atqarǵan qyzmetiniń nátijeleri týraly esep berilip, osy jylǵa arnalǵan jospary tanystyryldy.
Qasym-Jomart Toqaevqa áskeri daiyndyqtyń jai-kúii, Qazaqstan armiiasynyń quramy men qurylymyn jetildirý, júrgizilgen jedel jáne jaýyngerlik ázirlik sharalary jóninde aqparat berildi.
General-polkovnik Rýslan Jaqsylyqov byltyr Arnaiy operatsiialar kúshteri qurylǵanyn, desanttyq-shabýyldaý áskeriniń áleýeti artyp kele jatqanyn jetkizdi. Sondai-aq qazirgi syn-qaterler men qaýipterge bailanysty áskerdiń jaýyngerlik ázirlik baǵdarlamasy qaita qaraldy.
Memleket basshysyna armiiadaǵy jaǵymsyz jaittardyń aldyn alý, jastardyń áskeri boryshyn oryndaýǵa degen qulshynysyn arttyrý, sondai-aq áleýmettik qamsyzdandyrý júiesin jetildirý jóninde qorǵanys vedomstvosynyń qabyldap jatqan sharalary týraly málimet berildi.
Qorǵanys ministri Qarýly Kúshterdi zamanaýi tehnikamen jáne qarý-jaraqpen jabdyqtaý, aýmaqtyq qorǵanys áskerin damytý, áskeri infraqurylymdy jetildirý jáne bitimgerlik múmkindikterin keńeitý jóninde baiandady. Sondai-aq paidalanylmaityn áskeri múlik pen qarý-jaraqty joiý sharalary týraly esep berdi.
Budan bólek, Joǵarǵy Bas qolbasshyǵa jaýyngerlik ázirlikti shyńdaý, keń aýqymdy, sonyń ishinde halyqaralyq deńgeidegi áskeri oqý-jattyǵý jiyndaryn ótkizýge qatysty biylǵa josparlanǵan is-sharalar týraly baiandaldy.
Kezdesý sońynda Prezident áskeri qyzmetshilerdiń ómiri men densaýlyǵyn saqtaý, áskeri ortadaǵy moraldyq-psihologiialyq ahýaldy jaqsartý mańyzdy ekenin atap ótti. Sondai-aq ministrlikke elimizdiń qorǵanys qabiletin odan ári arttyrý, merzimdi áskeri qyzmetke shaqyrýdyń kóktemgi naýqanyn sapaly uiymdastyrý jóninde birqatar tapsyrma berdi.
