Qazaqstan Prezidenti Koreianyń ulttyq batyry Hon Bom Donyń qurmetine orai ótken rásimge qatysty, dep habarlaidy "Ult aqparat" Aqordanyń resmi saityna silteme jasap.
Memleket basshysy saltanatty jiyndaǵy sózinde, «bul – Qazaqstannyń korei jurtyna degen shynaiy yqylasy men zor qurmetiniń belgisi» dep atap ótti.
– Mundai is-sharalardyń tarihi mán-mańyzy airyqsha. Qazaqtar da, koreiler de Táýelsizdiktiń qadir-qasietin jaqsy túsinedi. Hon Bom Do – Koreianyń azattyǵy úshin kúresken biregei tulǵa. Naǵyz batyr, shynaiy otansúigish. General taǵdyrdyń jazýymen ómiriniń sońǵy jyldaryn qazaq jerinde ótkizdi. Sodan beri qansha jyl ótse de, atajurtynda batyrdyń erligi umytylǵan joq. Ony bizdiń halqymyz da jaqsy biledi. Qyzylorda qalasynda Hon Bom Donyń qurmetine memorial turǵyzylǵan. 2018 jyly batyrdyń týǵanyna 150 jyl toldy. Qazaqstan halqy Assambleiasy osyǵan orai arnaiy konferentsiia ótkizdi. Generaldyń esimi qazaq eliniń jadynda saqtalady. Onyń memorialy memleket qamqorlyǵynda bolady, – dedi Qazaqstan Prezidenti.
Qasym-Jomart Toqaev kezinde korei ultynyń kóptegen ókili Qazaqstanǵa eriksiz qonys aýdarǵanyn, olardyń arasynda Ge Bon Ý, Tsai Den Hak, Kim Man Sam siiaqty tanymal tulǵalar baryn atap ótti.
– Jer aýdarylǵan halqymyz koreilerdi baýyryna basyp, panalatty. Olar qazaq elinde ósip-ónip, naǵyz otandastarymyzǵa ainaldy. Bizdiń elde ár etnostyń óz tamyrynan ajyramai, tili men dilin saqtaýyna barlyq jaǵdai jasalǵan. Korei diasporasy da osy igilikti kórip otyr. Elimizde Qazaqstan koreileriniń qaýymdastyǵy bar. Korei mádeni ortalyqtary men Korei teatry jumys isteidi. Sondai-aq, korei tilinde gazet shyǵady. Korei baýyrlarymyz kóptegen salada tabysty eńbek etýde. Olardyń el ekonomikasyn órkendetýge qosyp jatqan úlesi zor. Qazaqstanda turatyn koreiler eki eldiń qarym-qatynasyn damytýǵa da belsendi atsalysyp júr. Bizdiń yntymaqtastyǵymyz bolashaqta osyndai dostyq rýhta nyǵaia beredi dep senemin, – dedi Qasym-Jomart Toqaev.
Qasym-Jomart Toqaev Koreia Respýblikasynyń Prezidenti Mýn Chje Inge Korei halqynyń ulttyq batyry Hon Bom Donyń qabirinen alynǵan topyraqty tabystady.
Koreia Respýblikasynyń Prezidenti Mýn Chje In Qasym-Jomart Toqaevqa zor rizashylyǵyn bildirip, ult batyry Hon Bom Doǵa eń joǵary memlekettik nagrada berilgenin habarlady.
