قازاقستان پرەزيدەنتٸ كورەيانىڭ ۇلتتىق باتىرى حون بوم دونىڭ قۇرمەتٸنە وراي ٶتكەن رەسٸمگە قاتىستى, دەپ حابارلايدى "ۇلت اقپارات" اقوردانىڭ رەسمي سايتىنا سٸلتەمە جاساپ.
مەملەكەت باسشىسى سالتاناتتى جيىنداعى سٶزٸندە, «بۇل – قازاقستاننىڭ كورەي جۇرتىنا دەگەن شىنايى ىقىلاسى مەن زور قۇرمەتٸنٸڭ بەلگٸسٸ» دەپ اتاپ ٶتتٸ.
– مۇنداي ٸس-شارالاردىڭ تاريحي مەن-ماڭىزى ايرىقشا. قازاقتار دا, كورەيلەر دە تەۋەلسٸزدٸكتٸڭ قادٸر-قاسيەتٸن جاقسى تٷسٸنەدٸ. حون بوم دو – كورەيانىڭ ازاتتىعى ٷشٸن كٷرەسكەن بٸرەگەي تۇلعا. ناعىز باتىر, شىنايى وتانسٷيگٸش. گەنەرال تاعدىردىڭ جازۋىمەن ٶمٸرٸنٸڭ سوڭعى جىلدارىن قازاق جەرٸندە ٶتكٸزدٸ. سودان بەرٸ قانشا جىل ٶتسە دە, اتاجۇرتىندا باتىردىڭ ەرلٸگٸ ۇمىتىلعان جوق. ونى بٸزدٸڭ حالقىمىز دا جاقسى بٸلەدٸ. قىزىلوردا قالاسىندا حون بوم دونىڭ قۇرمەتٸنە مەموريال تۇرعىزىلعان. 2018 جىلى باتىردىڭ تۋعانىنا 150 جىل تولدى. قازاقستان حالقى اسسامبلەياسى وسىعان وراي ارنايى كونفەرەنتسييا ٶتكٸزدٸ. گەنەرالدىڭ ەسٸمٸ قازاق ەلٸنٸڭ جادىندا ساقتالادى. ونىڭ مەموريالى مەملەكەت قامقورلىعىندا بولادى, – دەدٸ قازاقستان پرەزيدەنتٸ.
قاسىم-جومارت توقاەۆ كەزٸندە كورەي ۇلتىنىڭ كٶپتەگەن ٶكٸلٸ قازاقستانعا ەرٸكسٸز قونىس اۋدارعانىن, ولاردىڭ اراسىندا گە بون ۋ, تساي دەن حاك, كيم مان سام سيياقتى تانىمال تۇلعالار بارىن اتاپ ٶتتٸ.
– جەر اۋدارىلعان حالقىمىز كورەيلەردٸ باۋىرىنا باسىپ, پانالاتتى. ولار قازاق ەلٸندە ٶسٸپ-ٶنٸپ, ناعىز وتانداستارىمىزعا اينالدى. بٸزدٸڭ ەلدە ەر ەتنوستىڭ ٶز تامىرىنان اجىراماي, تٸلٸ مەن دٸلٸن ساقتاۋىنا بارلىق جاعداي جاسالعان. كورەي دياسپوراسى دا وسى يگٸلٸكتٸ كٶرٸپ وتىر. ەلٸمٸزدە قازاقستان كورەيلەرٸنٸڭ قاۋىمداستىعى بار. كورەي مەدەني ورتالىقتارى مەن كورەي تەاترى جۇمىس ٸستەيدٸ. سونداي-اق, كورەي تٸلٸندە گازەت شىعادى. كورەي باۋىرلارىمىز كٶپتەگەن سالادا تابىستى ەڭبەك ەتۋدە. ولاردىڭ ەل ەكونوميكاسىن ٶركەندەتۋگە قوسىپ جاتقان ٷلەسٸ زور. قازاقستاندا تۇراتىن كورەيلەر ەكٸ ەلدٸڭ قارىم-قاتىناسىن دامىتۋعا دا بەلسەندٸ اتسالىسىپ جٷر. بٸزدٸڭ ىنتىماقتاستىعىمىز بولاشاقتا وسىنداي دوستىق رۋحتا نىعايا بەرەدٸ دەپ سەنەمٸن, – دەدٸ قاسىم-جومارت توقاەۆ.
قاسىم-جومارت توقاەۆ كورەيا رەسپۋبليكاسىنىڭ پرەزيدەنتٸ مۋن چجە ينگە كورەي حالقىنىڭ ۇلتتىق باتىرى حون بوم دونىڭ قابٸرٸنەن الىنعان توپىراقتى تابىستادى.
كورەيا رەسپۋبليكاسىنىڭ پرەزيدەنتٸ مۋن چجە ين قاسىم-جومارت توقاەۆقا زور ريزاشىلىعىن بٸلدٸرٸپ, ۇلت باتىرى حون بوم دوعا ەڭ جوعارى مەملەكەتتٸك ناگرادا بەرٸلگەنٸن حابارلادى.
