Memleket basshysy Qasym-Jomart Toqaev Qazaqstan halqyna Joldaýynda Konstitýtsiialyq sot qurýdy usyndy, dep habarlaidy QazAqparat.
«Quqyq qorǵaý institýttaryn kúsheitý, Konstitýtsiianyń eń joǵarǵy zańdy kúshi bar Ata Zańymyz – elimizdiń búkil quqyqtyq júiesiniń tiregi. Alaida belgili bir zań aktisi nemese sheshim oǵan sai kele me degen suraqqa naqty jaýap berý qiyndyq týdyratyn kezder bolady. Qazaqstandaǵy túrli quqyq normalaryn Konstitýtsiialyq keńes túsindiredi. Biraq azamattar osyndai túsinikteme alý úshin bul organǵa tikelei júgine almaidy. Kóptegen memlekette Konstitýtsiialyq sot institýty bar. Oǵan kez kelgen adam óziniń saýalyn joldai alady. Táýelsizdiktiń alǵashqy jyldary mundai organ Qazaqstanda bolǵan. Ata zań erejeleriniń múltiksiz saqtalýyn osy mekeme tiimdi qamtamasyz etedi dep sanaimyn. Sony eskere otyryp, men elimizde Konstitýtsiialyq sot qurýdy usynamyn», - dedi Prezident.
Sonymen birge, Memleket basshysy Bas prokýror men Adam quqyǵy jónindegi ýákilge de Konstitýtsiialyq sotqa júginý múmkindigin berýdi usyndy.
«Bul bastamalar ádil ári quqyqtyq memleket qurý jolyndaǵy mańyzdy qadam bolady dep senemin. Sondai-aq institýttsionaldyq turǵydan tepe-teńdikti saqtaýǵa múmkindik beredi. Oǵan qosa, azamattarymyzdyń konstitýtsiialyq quqyǵynyń qorǵalýyn jvaqsarta túsedi», - dedi Toqaev.
