Memleket basshysy Halyqaralyq hokkei federatsiiasynyń prezidenti Liýk Tardifti qabyldady, dep habarlaidy "Ult aqparat" Aqordanyń resmi saityna silteme jasap.
Kezdesýde hokkei sportyn damytýdyń jáne keńinen tanytýdyń perspektivalary, sondai-aq elimizde iri halyqaralyq týrnirler ótkizý máselesi talqylandy.
Qasym-Jomart Toqaev Liýk Tardifke Qazaqstan hokkeiiniń jetistikteri, otandyq sportty damytý úshin qabyldanyp jatqan sharalar men sport infraqurylymynyń múmkindikteri týraly aitty.
Memleket basshysy elimizde hokkei sportyna qyzyǵýshylyq artyp kele jatqanyn, balalar men jasóspirimderge arnalǵan hokkei mektepteri men jastar komandalarynyń sany kóbeigenin atap ótti. Búginde sporttyń osy túrimen 14 myń asa adam shuǵyldanady.
Kezdesý barysynda sport infraqurylymdarynyń múmkindikterine erekshe nazar aýdaryldy. Osy rette Prezident elimizdiń 2027 jyly álem chempionatyn ótkizýge joldaǵan ótinimi 2023 jyly mamyrdaǵy daýys berý kezinde qoldaý tapsa, Qazaqstannyń osy sharany uiymdastyrýǵa daiyn ekenin aitty.
Qasym-Jomart Toqaev Halyqaralyq hokkei federatsiiasy óz tarihynda Aziia qurlyǵynda eshqashan joǵary deńgeidegi chempionattar ótkizbegenin atap ótti.
Halyqaralyq hokkei federatsiiasynyń prezidenti kezdesýge múmkindik bergeni úshin Memleket basshysyna alǵys aityp, Qazaqstanda hokkei sportyn damytýǵa kóńil bólinip jatqanyn joǵary baǵalady. Sondai-aq elimiz halyqaralyq jarystardy óte joǵary deńgeide ótkizýge qajet barlyq infraqurylymǵa ie ekenin jetkizdi.
