Qazaqstan Prezidenti Halyqaralyq elektr bailanysy odaǵynyń Bas hatshysy Chjao Hoýlindi qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan men Halyqaralyq elektr bailanysy odaǵynyń infokommýnikatsiialyq tehnologiia salasyndaǵy ózara is-qimyl máseleleri talqylandy.
Prezident Qazaqstanda jańa innovatsiialar men tehnologiialardy damytýǵa jáne engizýge basa mán beriletinin atap ótti. Memleket basshysy óńirde zamanaýi infokommýnikatsiialyq infraqurylym qurýdyń mańyzdylyǵyn aitty.
Chjao Hoýlin Qasym-Jomart Toqaevqa Halyqaralyq elektr bailanysy odaǵy qyzmetiniń negizgi baǵyttary týraly málimdedi. Atap aitqanda, ol Prezidentke ózi basqaratyn odaqtyń 4G jáne 5G siiaqty telekommýnikatsiialar men qyzmet kórsetý salasy boiynsha ázirlep jatqan halyqaralyq standarttary jóninde aitty.
Halyqaralyq elektr bailanysy odaǵy Bas hatshysynyń baǵalaýynsha, Qazaqstanda blokchein, Big Data tehnologiialaryn, jańa sandyq qarjy quraldaryn paidalanýǵa, sondai-aq, aýyl sharýashylyǵynda, bilim berý jáne densaýlyq saqtaý salalarynda, memlekettik basqarý isinde keńinen qoldanylatyn aqparattyq-kommýnikatsiialyq tehnologiialardy engizýge jaqsy múmkindikter jasalǵan dep sanaidy.
Kezdesýge Tsifrlyq damý, qorǵanys jáne aeroǵarysh ónerkásibi ministri Asqar Jumaǵaliev, Prezidenttiń kómekshisi Murat Nurtileýov, Halyqaralyq elektr bailanysy odaǵynyń óńirlik ókili Kirill Oparin qatysty.
