Foto: Akorda.kz
Memleket basshysy Ál-Farabi atyndaǵy QazUÝ rektory Janseiit Túimebaevty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Prezidentke ýniversitettegi maman daiarlaý isiniń, ǵylymi-zertteý jumystarynyń nátijeleri týraly baiandalyp, kelesi jyly 90 jyldyǵyn atap ótetin joǵary oqý ornynyń strategiialyq damý jospary tanystyryldy.
Janseiit Túimebaevtyń aitýynsha, qazir ýniversitette jalpy quny 8,1 milliard teńge bolatyn 400 ǵylymi joba iske asyrylyp jatyr.
Prezidenttiń mamyr aiyndaǵy QHR-ǵa resmi sapary aiasynda QazUÝ-da Qytaidyń Soltústik-Batys politehnikalyq ýniversitetiniń filialyn ashý jóninde kelisimge qol qoiylǵan bolatyn. 12 qazanda ýniversitet bazasynda atalǵan oqý ornynyń filialy ashyldy.
Budan bólek, Memleket basshysyna 2024-2026 jyldary QazUÝ qalashyǵy qurylysynyń ekinshi kezeńi júzege asyrylatyny jóninde málimet berildi. Jańa qalashyqta 8 oqý korpýsy, tehnopark jáne 12 jataqhana boi kótermek. Jýyq arada 3180 oryndyq 3 jataqhananyń qurylysy bastalady.
Kezdesý sońynda Qasym-Jomart Toqaev bilim sapasyn jaqsartý, elimizdiń damýyna ǵylymnyń qosatyn úlesin arttyrý jáne ýniversitet qalashyǵyn jańǵyrtý jóninde naqty tapsyrmalar berdi.
