Foto: Akorda.kz
Memleket basshysy "Qazaqtelekom" AQ basqarma tóraǵasy Qýanyshbek Esekeevti qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Prezidentke «Qazaqtelekom» AQ kompaniialar tobynyń 2022 jyly qol jetkizgen negizgi qarjy-ekonomikalyq kórsetkishteri men júzege asyrýǵa josparlaǵan perspektivti jobalary týraly málimet berildi.
Qýanyshbek Esekeevtiń aitýynsha, ótken jyly "Qazaqtelekom" AQ-nyń negizgi qarjy jáne ekonomikalyq kórsetkishteri ósti. Bul biyl birqatar aýqymdy jobany iske asyrýǵa múmkindik beredi. Olardyń negizgisi 5G jelisin júrgizý jobasy bolmaq. Atalǵan mindetti "MTS" JShS jáne "Ksell" AQ operatorlarynyń konsortsiýmy atqarady. "Qazaqtelekom" aktsionerlik qoǵamynyń enshiles kompaniialary 2027 jylǵa deiin elimiz boiynsha 7 myńnan astam bazalyq stantsiia salýǵa tiis. Biyl Astana, Almaty jáne Shymkent qalalarynda osyndai 486 stantsiia paidalanýǵa beriledi.
Qasym-Jomart Toqaevqa "Ázerbaijan – Qazaqstan" baǵyty boiynsha Kaspii teńiziniń tabany arqyly tartylatyn talshyqty-optikalyq bailanys jelisiniń qurylysyna qatysty halyqaralyq jobany "AzerTelecom" kompaniiasymen birlesip júzege asyrý jumystary jalǵasatyny jóninde baiandaldy. Sonymen qatar biyl aýyldardy odan ári internetpen qamtamasyz etý, Qazaqstan abonentterin eskirgen ADSL jelilerinen optikaǵa kóshirý, kópqabatty turǵyn úilerdi GPON tehnologiiasy arqyly jyldamdyǵy joǵary internetke qosý sekildi jobalar iske asyrylady.
Kezdesý sońynda Prezident halqymyz ben ekonomikamyz úshin josparlanǵan jobalardy ýaqytyly jáne sapaly oryndaýdyń mańyzdylyǵyna nazar aýdardy. Budan bólek, Memleket basshysy qalalar men aýyldyq jerlerdegi telekommýnikatsiia jelilerin odan ári damytý, sondai-aq Qazaqstannyń tranzittik áleýetin arttyrý úshin halyqaralyq derekter trafiginde jelilik infraqurylymdy órkendetý jóninde birqatar naqty tapsyrma berdi.
