Qazaqstan prezidenti Qasym-Jomart Toqaev halyqaralyq armiia oiyndarynda sátti óner kórsetken Qazaqstan Qarýly kúshteriniń komandasyn quttyqtady.
"Sizder joǵary kásibi daiyndyq pen jaýyngerlik sheberlikterińizdi kórsetip, 39 komandanyń arasynan 3-shi orynǵa ie boldyńyzdar. Igilikti isterińizde jańa jetistikterge jete berińizder!– dep jazdy memleket basshysy Twitter-degi paraqshasynda.
Qazaqstandyqtardy Máskeý oblysynyń "Alabino" poligonynda marapattady. "Patriot" saiabaǵynda V halyqaralyq armiia oiyndarynyń saltanatty jabylý rásimi ótti. Sharaǵa Qazaqstannyń qorǵanys ministri Nurlan Ermekbaev qatysty, - dep habarlady vedomstvonyń baspasóz qyzmeti.
Qazaqstandyq áskeriler jeke esepte birneshe márte úzdik nátije kórsetti. Otandyq Sý-25 ekipajy "shabýyl aviatsiiasy" nominatsiiasynda birinshi oryndy ielendi. Jeke sheberlik synaǵynda qazaqstandyq áskeri meditsina qyzmetkerlerine teń keletinder bolmady.
Eń qyzyqty baiqaýdyń biri - "Tank biatlonynda" qazaqstandyq komanda úzdik úshtik qatarynda boldy.
Mereitoilyq halyqaralyq armiia oiyndary 3-17 tamyz aralyǵynda ótti. Jarys Qazaqstan, Resei, Ázerbaijan, Armeniia, Belarýs, Úndistan, Iran, Qytai jáne Ózbekstan elderiniń 25 áskeri poligonynda ótti. Biyl 32 baiqaýdan turatyn saiysqa 39 elden 223 komanda qatysty.
