Qasym-Jomart Toqaev Úndistannyń Premer-Ministri Narendra Modige jedelhat joldady, dep habarlaidy "Ult aqparat" Aqordaǵa silteme jasap.
Jedelhatta Qasym-Jomart Toqaev Úndistanda COVID-19 indetiniń qatty órshýine bailanysty qalyptasqan qiyn-qystaý kezeńde Qazaqstan halqy jáne jeke ózi úndi eliniń qaiǵy-qasiretine ortaq ekenin jetkizgen.
Memleket basshysy koronavirýstyń shekaraǵa baǵynbaitynyn, búkil álemge taralyp, adamdarǵa kóptep juǵyp jatqanyn qynjyla atap ótti. Ol indetten qaitys bolǵan adamdardyń otbasylaryna kóńil aityp, dertke shaldyqqandardyń tezirek saýyǵyp ketýine tilektestik bildirdi.
– Osyndai qiyn-qystaý kezeńde biz úndistandyq dostarymyzben birge pandemiiany aýyzdyqtaý maqsatynda kúsh biriktirýge jáne memleketterimiz arasyndaǵy berik dostyq pen ózara qoldaý aiasynda qajetti kómek kórsetýge daiynbyz. Úndistan Úkimeti Sizdiń dana basshylyǵyńyzben bul daǵdarysty eńserip, eldiń qalypty ómirge oralýyn qamtamasyz ete alatynyna kámil senemin, – delingen jedelhatta.
Qasym-Jomart Toqaev Narendra Modige Úndistannyń qazirgi aýyr synaqtan súrinbei ótip, eliniń ornyqty damýyna jáne odan ári ósip-órkendeýine tilektestik bildirdi.
