Foto: Aqordanyń baspasóz qyzmeti
Memleket basshysy «Qazaqstan temir joly» UK» AQ basqarma tóraǵasy Nurlan Saýranbaevty qabyldady, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevqa ulttyq kompaniia qyzmetiniń 2023 jylǵy negizgi nátijesi jáne aldaǵy kezeńge arnalǵan jospary týraly esep berildi.
Nurlan Saýranbaevtyń aitýynsha, sońǵy úsh jylda «Qazaqstan temir jolynyń» negizgi óndiristik kórsetkishterinde ósim baiqalady. Byltyr júk ainalymy 7 paiyzǵa artyp, 270 milliard tonna-kilometrge jetti. Tranzittik tasymaldaý kólemi 18 paiyzǵa ulǵaiyp, 27 million tonnadan asty. Nátijesinde kompaniianyń kirisi ótken jylmen salystyrǵanda 29,3 paiyzǵa ósip, 1,9 trillion teńgeni qurady. Kompaniia 154 milliard teńge taza paida tapty. Bul 2022 jylmen salystyrǵanda tórt ese kóp ári kompaniianyń rekordtyq kórsetkishi sanalady.
Prezidentke Dostyq – Moiynty, Almaty stantsiiasyn ainalyp ótetin temirjol jelisin salý jáne basqa da iri infraqurylymdyq jobalardyń iske asyrylýy týraly baiandaldy. Búgingi tańda 350 shaqyrymnan astam jol tóselgen. Atalǵan jobalardyń iske qosylýy memleketaralyq túiisý pýnktteriniń ótkizý qabiletin arttyrady.
Sonymen qatar Memleket basshysyna Sian qalasyndaǵy qurǵaq portta júk terminalynyń qurylysy aiaqtalǵany jóninde málimet berildi. Qytaidyń eń iri logistikalyq habynda ornalasqan bul terminal elimizge qarai júkterdiń turaqty tasymaldanýyn qamtamasyz etedi jáne otandyq eksporttaýshylar úshin jańa ótkizý naryqtaryna jol ashady.
Álemdik Huawei, Wabtec jáne PSA sekildi jetekshi kompaniialarmen birge «Aqyldy temirjol» jobasyn júzege asyrý jumystary júrgizilip jatyr. Jańa sheshimderdiń engizilýi temirjoldyń ótkizý qabiletin ulǵaitýǵa, otyn shyǵynyn azaitýǵa jáne poiyzdardyń qaýipsizdigin arttyrýǵa múmkindik beredi.
Kezdesý sońynda Qasym-Jomart Toqaev kompaniianyń investitsiialyq jobalaryn iske asyrý mańyzdy ekenin atap ótip, elimizdiń kólik-tranzit áleýetin damytý máselesine basa nazar aýdardy.
