Memleket basshysy Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanulyn qabyldady, dep habarlaidy Aqordanyń baspasóz qyzmeti.
Kezdesýde Prezident Qazaqstan musylmandaryn qasietti Ramazan aiynyń bastalýymen quttyqtady.
Qasym-Jomart Toqaevqa Qazaqstan musylmandary dini basqarmasynyń atqaryp jatqan jumystary men aldaǵy jospary týraly baiandaldy. Naýryzbai qajy Taǵanulynyń aitýynsha, múftiiat osy jyldy «Islam – yntymaq pen birlik dini» dep jariialaǵan. Osyǵan bailanysty elimizde jyl boiyna atalǵan taqyrypta forýmdar ótkiziledi. Sonymen qatar din men dástúrdi sabaqtastyra otyryp, jas qyz-kelinshekterdi imandylyqqa baýlityn «Ájeler mektebiniń» ashylǵany jaily aityldy.
Memleket basshysyna Qazaqstan musylmandary dini basqarmasynyń Oraza aiynda uiymdastyratyn sharalary týraly málimet berildi. Naýryzbai qajy aldaǵy ýaqytta Túrkitildes elderdiń Bas múftileriniń Alqasy qurylatynyn jetkizdi.
