Memleket basshysy Qasym-Jomart Toqaev onlain rejimde ótip jatqan Qazaqstan mashina jasaýshylarynyń VIII forýmy qatysýshylaryna quttyqtaý hat joldady.
Hatty «Qazaqstannyń mashina jasaýshylar odaǵy» zańdy tulǵalar birlestigi basqarmasynyń tóraǵasy Meiram Pishembaev oqyp berdi, dep habarlaidy QazAqparat tilshisi.
«Qurmetti forým qatysýshylary! Sizderdi Qazaqstan mashina jasaýshylarynyń VIII forýmynyń ashylýymen quttyqtaimyn. Forým memleket pen biznestiń júieli dialogy, mashina jasaý salasynyń ózekti máselelerin sheshý úshin suhbat alańyna ainaldy.
Biyl sharalardyń basym bóligi onlain rejimde ótip jatyr. Bul forým da solai ótýde jáne onyń aiasynda I Halyqaralyq mashina jasaý jáne metall óńdeý onlain-kórmesi ashylǵan. Pandemiiamen bailanysty kúrdeli ekonomikalyq kezeńge qaramastan otandyq mashina jasaý osy jyly 14 paiyzdyq jaqsy ósim qarqynyn kórsetip otyr. Osy kórsetkish boiynsha mashina jasaý eldiń búkil óńdeý sektorynda kóshbasshy orynǵa shyqty. Meniń Joldaýymda naǵyz ártaraptandyrylǵan, tehnologiialyq damyǵan ekonomikany qurý, óńdeý ónerkásibi óndirisiniń kólemin 1,5 ese arttyrý tapsyrmalary júkteldi», - dep atap ótedi QR Prezidenti quttyqtaýynda.
Qasym-Jomart Toqaevtyń atap ótýinshe, memleket bul úshin otandyq óndirýshilerdi qoldaý tetikterin jetildirip, ónerkásiptik saiasat týraly zań qabyldanatyn bolady.
«Jańa jaǵdaidaǵy Qazaqstan mashina jasaý salasy óziniń qarqyndy damýyn jalǵastyratyndyǵyna senimdimin. Salanyń óndiristi keńeitýge jáne eksportty arttyrýǵa aitarlyqtai áleýeti bar. Barlyqtaryńyzǵa jemisti jumys jáne alǵa qoiylǵan maqsattarǵa qol jetkizýdi tileimin!», - dedi Memleket basshysy.
