kórneki sýret
Memleket basshysy IV Qytai halyqaralyq importtyq taýarlar kórmesiniń ashylý rásiminde beineúndeý jasady, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev óziniń beineúndeýinde jiynǵa qatysýshylardy IV Qytai halyqaralyq importtyq taýarlar kórmesiniń ashylýymen quttyqtady.
– Biyl bizdiń dostas halyqtarymyz óz tarihyndaǵy mańyzdy beleske jetti. Qazaqstan Táýelsizdigine – 30 jyl. Qytai Kommýnistik partiiasynyń qurylǵanyna – 100 jyl. Sondai-aq, eki aidan keiin taǵy bir aitýly oqiǵany atap ótemiz. Qazaqstan men Qytai arasynda diplomatiialyq qatynastardyń ornaǵanyna 30 jyl tolady. Búgin bizdiń jan-jaqty ári máńgilik strategiialyq seriktestigimiz kemeldenip, jańa kezeńge qadam basty dep nyq senimmen aita alamyn. Qarqyndy damyp kele jatqan Qytai eli árdaiym Aziiadaǵy eń basty jáne senimdi seriktesimiz bolyp qala beredi, – dedi Qazaqstan Prezidenti.
Memleket basshysy ózara tiimdi ekijaqty yntymaqtastyq keń-baitaq Eýraziia qurlyǵynda birlese damýǵa jáne órkendeýge jol ashyp otyrǵanyna, saýda-ekonomikalyq qatynastar – yqpaldastyǵymyzdyń berik irgetasy ekenine toqtalyp, aldaǵy kezeńde solai bola beretinin atap ótti.
– Qiyndyqqa qaramastan, kúrdeli 2020 jyldyń ózinde ekijaqty taýar ainalymy 5 paiyzǵa ósip, 15 milliard dollardan asty. «Ózgerister jeli soqqanda, bireýler qabyrǵa turǵyzady, endi bireýler jel diirmen salady», – degen kóne qytai naqyly bar. Pandemiiaǵa bailanysty Qazaqstan-Qytai shekarasyna engizilgen ýaqytsha shekteý sharalary tezirek aiaqtalyp, alys-beris qaitadan jandana túsedi dep senemiz, – dedi Qasym-Jomart Toqaev.
Qazaqstan Prezidenti quttyqtaý sózinde saýda-sattyq árdaiym órkendeýdiń jáne halyqaralyq yntymaqtastyqtyń basty qozǵaýshy kúshi sanalatynyn, bul qaǵidat ǵasyrlar boiy Uly Jibek jolynyń boiynda ornalasqan bizdiń óńir úshin de asa mańyzdy ekenin aitty.
– Osy ejelgi saýda joly Tóraǵa Si Tszinpinniń «Beldeýler men joldar» atty aýqymdy bastamasynyń arqasynda qaita jańǵyrdy. Qazir jyl saiyn Qytaidan Eýropaǵa Qazaqstan aýmaǵy arqyly 500 myńnan astam konteiner tasymaldanady. Quryq teńiz ailaǵy iske qosylǵannan keiin «Lianiýngan – Kars» tasymal dálizimen Qorǵastan Ystanbulǵa júk jetkizý merzimi bes esege, iaǵni 60 kúnnen 13 kúnge deiin qysqardy. Biz Qorǵastan bólek, birqatar kórshiles eldermen jańa shekaraaralyq hab quryp jatyrmyz, – dep atap ótti Memleket basshysy.
Qasym-Jomart Toqaev búkil álemdi sharpyǵan koronavirýs indeti jahandyq saýda jelisiniń jumysyna aitarlyqtai nuqsan keltirgenine toqtaldy. Sondai-aq Qazaqstan turaqty tranzittik tasymal baǵdaryn nyǵaityp, ony ártaraptandyryp, innovatsiialyq logistikalyq ádis-tásilderdi engizý úshin barlyq múddeli tarappen tyǵyz jumys júrgize beretinin aitty.
– Búgin esigin aiqara ashqan Qytai halyqaralyq importtyq taýarlar kórmesi, shyn máninde, dúniejúziniń ár túkpirindegi eksportshylardy uiystyratyn ortalyqqa ainaldy. Osy mańyzdy sharaǵa 120-dan astam memleketten taýar óndirýshiler jinalyp otyr. Bul Shanhai kórmesi Qytaidaǵy alyp naryqqa kiretin «altyn qaqpa» ekenin aiqyn kórsetti. Osy kórmege Qazaqstannan 30 iri ónim óndirýshi qatysýda. Olar jalpy quny 100 million dollardan asatyn azyq-túlik jáne aýyl sharýashylyǵy ónimderin satýǵa kelisim shart jasaidy dep josparlanyp otyr, – dedi Qazaqstan Prezidenti.
Qazaqstan Prezidenti sózin qorytyndylai kele, Shanhai kórmesine qatysýshylardyń jumysyna tabys tilep, ózara tiimdi saýda bailanystary kókjieginiń keńeie berýine niettestik bildirdi.
